Maqtaaralda ózbekstandyq sarbazdy izdestirý jumystary áli de jalǵasýda
MAQTAARAL. QazAqparat – Sý tasqyny bolǵan Maqtaaral aýdanynda kanaldardan Ózbekstandyq sarbazdy izdestirý jumystary áli de jalǵasýda. 20 maýsymda bastalǵan sharaǵa Túrkistan oblysy men Shymkent qalasynyń súńgýirleri men kınologtary qatysyp, olar jalpy 120 shaqyrym jerdi qarap shyqqan, dep habarlaıdy QazAqparat tilshisi.
Shymkent qalalyq TJD ishki jáne syrtqy kommýnıkatsııalar tobynyń málimetinshe, Ózbekstan Respýblıkasy Ulttyq ulanynyń 1992 jyly týǵan áskerı qyzmetkerin izdestirý jumystary Jeńis, Jańaturmys eldimekenderiniń janyndaǵy kanaldar mańynda júrgizilýde. Bul jumystarǵa Shymkent qalalyq TJD Jedel-qutqarý jasaǵynyń 3 qutqarýshysy, 2 kınologııalyq esebi, Shekara qyzmetiniń 1 qyzmetkeri, Ózbekstan Respýblıkasy TJM jedel-qutqarý jasaǵynyń 3 qutqarýshysy jumyldyrylǵan. Іzdestirý jer ústi, sý ústi jáne sý asty tásilderimen júrgizilýde.
«Іzdestirý jumystary Jetisaı aýdanynda da jalǵasýda. Qutqarýshylar 27 maýsymnan bastap Ataqonys eldimekeninen Atameken aýyldyq okrýginiń Qoǵaly eldimekenine deıin motorly qaıyqpen qarap shyqqan. Ortalyq ashtyq-dala arnasynan izdestirý jumystaryn júrgizýde. Munda qutqarýshylar 48 km jerdi qarap shyqqan. Alaıda nátıje joq. Sý astynda 400 metr jerdi qarap shyqqan. Іzdestirý-qutqarý jumystary jalǵasýda» delingen habarlamada.
Aıta keteıik, iz-túzsiz ketken ózbekstandyq sarbaz sý tasqyny kezinde joǵalyp ketken bolatyn. Ol kórshi eldiń aýmaǵynda tabylmaǵan soń Ózbekstan respýblıkasynyń ókilderi onyń Qazaqstannyń Maqtaaral aýdany aýmaǵynan izdeýge qolǵabys etý jóninde kómek suraǵan bolatyn.
