Maqtaaralda Nurmuhamed Esentaevtiń 110 jyldyq mereıtoıy atalyp ótti
MAQTAARAL. QazAqparat – Túrkistan oblysy, Maqtaaral aýdanynda aıasynda «Sotsıalıstik Eńbek Eri» atanǵan Nurmuhamed Esentaevtyń 110 jyldyq mereıtoıy keń kólemde atalyp ótti. Elbasymyz N.Á.Nazarbaevtyń «Bolashaqqa baǵdar: Rýhanı jańǵyrý» memlekettik baǵdarlamasy aıasynda uıymdastyrylǵan sharaǵa aýdan ákimi B.Asanov pen zııaly qaýym ókilderi, jergilikti turǵyndar qatysty, dep habarlaıdy QazAqparat tilshisi.
Atakent kentiniń «Dostyq» mádenıet úıinde Maqtaaral aýdanynyń tarıhy týraly kórme qoıylyp, aýdan ákimi Baqyt Asanov bastaǵan qonaqtar ótkenniń estelikterimen tanysty. 90 jyldan asa tarıhy bar aýdannyń ótkeni men búgini foto sýretter arqyly berilgen kórmede «Maqtaaralym - maqtanyshym», «Ósken óńirdiń tarıhy», «Aýdan tarıhy muraǵatta», «Uly dalanyń uly esimderi», «Uly dalanyń uly perzenti», «Óńirimizdiń sotsıalıstik eńbek erleri» atty stendter qoıylǵan. Al, merekelik keshti saltanatty túrde ashyp bergen aýdan basshysy Sotsıalıstik eńbek eri N.Esentaevtyń ómir baıanyna qysqasha toqtalyp, onyń óńirge jáne maqta salasynda jasaǵan eren eńbekterin atap ótti.
«N.Esentaev Maqtaaraldyń »Dzerjınskıı« atyndaǵy bólimsheni basqarǵan kezde halyqtyń turmys jaǵdaıy edáýir jaqsardy. Saıaly baq, asfalt joldar, kórkem mádenı ortalyqtar, mektep, klýb, kitaphanalar, balabaqsha, emhana, aýrýhana, monsha salyndy. Bólimshege tabıǵı gaz jelisin ákelýde N.Esentaevtyń sińirgen eńbegi orasan zor. Búgingi kúnde úlken ǵylymı zertteý ınstıtýtyna aınalǵan maqtanyń jańa sorttaryn zertteıtin stantsııa da osy bólimshede ashylyp, iske qosyldy. »Jańbyrlatý« tásilimen maqta sýarý, eki ıarýsty soqa jáne Rýmynııada jasalǵan maqta egetin seıalkalardy qoldaný, 60 sm ornyna júıek arasyn 90 sm-ge jetkizý sekildi maqta sharýashylyǵyńdaǵy jańalyqtar da Esentaevtyń basshylyǵyndaǵy bólimsheden bastaý aldy» - dedi Baqyt Nasyrhanuly.
Saltanatty jıynda aýdanǵa belgili birneshe azamattar sózge shyǵyp, Esentaevtyń erlikterin eske alysty.
Aıta keteıik, Nurmuhamed Esentaev 1909 jyly Shyǵys Qazaqstan oblysy, Zaısan aýdanynda ómirge kelgen. 1957 jly KSRO Joǵary Keńesiniń jarlyǵymen N. Esentaevqa «Sotsıalıstik Eńbek Eri» ataǵy berildi.
