Maqtaaralda nóser jańbyrdan jınalǵan sý deńgeıi tómendep keledi
TÚRKІSTAN. QazAqparat - Maqtaaral aýdanyn jańbyr sýynan tazartý jumystary jalǵasýda. Bul maqsatta jeke quramnan 198 adam men 27 arnaıy tehnıka jumyldyrylǵan, dep habarlaıdy QazAqparat tilshisi.
Jergilikti memlekettik organdar men oblystyq, aýdandyq tótenshe jaǵdaılar qyzmetine tıesili 63 birlik motopompa jáne jeke kásipkerler, aýdan turǵyndaryna tıesili 150-den astam sý sorý quraldary jańbyr sýyn syrtqa aǵyzyp jatyr.
Uzyndyǵy 12 shaqyrymǵa jýyq aryq-atyzdar qazylyp jáne tazalanyp, qazirgi jaǵdaı boıynsha 58050 tekshe metr sý aýmaqtardan shyǵaryldy.
Qazirgi kezde aýdannyń iri kollektorlarynda sýdyń deńgeıi aıtarlyqtaı túskeni baıqalady. Jeti kollektorda da sý deńgeıi tómendegen.
Búgin aýdandyq tótenshe jaǵdaılardyń aldyn alý jáne joıý jónindegi shtabtyń kezekti otyrysy ótti. Májiliske oblystyq tótenshe jaǵdaılar departamentiniń bastyǵy, polkovnık Nurǵalı Júnisov qatysty.
Jıyn barysynda bekitilgen keste boıynsha shtab músheleri ózderine tıesili jumystardyń barysy týraly baıandap, eldimekenderdegi ahýal týraly aıtyldy. Qazirgi tańda jaǵdaı turaqtalǵan. Degenmen, aýdanǵa qarasty Maqtaaral aýyldyq okrýginiń keıbir eldimekenderinde jaǵdaı áli de kúrdeli. Osyǵan baılanysty aýdan basshysy tarapynan sý tartý, ony qashyrtý jumystaryn báseńsitpeý kerektigi aıtyldy.
Polkovnık N.Júnisov turǵyndarǵa túsindirý jumystaryn kúsheıtý kerektigin aıtty. Máselen, kentter men okrýgterge bólingen motopompalar arqyly eń birinshi kezekte áleýmettik jaǵdaıy tómen otbasylarǵa jáne úıine kirip-shyǵý múmkindigi joq turǵyndarǵa kómektesý kerektigin jetkizdi. Departament bastyǵy tik drenajdy uńǵymalardyń turaqty jumys isteýin qamtamasyz etý kerektigin aıtyp, sala mamandaryna tapsyrmalar berdi.
Aıta keteıik, Maqtaaral aýdanynda naýryz aıynyń basynan beri tolassyz jaýǵan jańbyrdyń saldarynan birneshe eldimekenderde kósheler men úı aýlýlaryn sý basý jaǵdaılary oryn alǵan bolatyn. Qazirgi tańda ahýal turaqtalǵanymen aýdandyq tótenshe jaǵdaılardyń aldyn alý jáne joıý jónindegi shtab jumysyn jalǵastyra bermek.
