Maqtaaralda muqtaj otbasylarǵa 10 baspana syıǵa tartyldy
MAQTAARAL. QazAqparat - Túrkistan oblysy Maqtaaral aýdanynda muqtaj otbasylarǵa 10 baspana syıǵa tartyldy. Jańa baspanalardy kásipker-metsenat, memleket jáne qoǵam qaıratkeri Bolat Ótemuratovtyń qory tartý etti, dep habarlaıdy QazAqparat tilshisi.
Búgin aýdan ákimi Baqyt Asanov baspanaly bolǵan otbasylardy qýanyshymen quttyqtap, úılerdiń kiltterin tabystady.
«Árbir otandasymyzdyń baspanaly bolǵanyn kórý - men úshin úlken qýanysh. Búgin Bolat Ótemuratov qorynyń atynan Sizderge baspana kiltterin tabystap otyrmyz. Bul úılerdiń barlyǵy da jetim balalar men ata-anasynyń qamqorlyǵynsyz qalǵan balalar, kóp balaly otbasylar, halyqtyń áleýmettik jaǵynan osal toptary sanatyndaǵy kezekte turǵan azamattarǵa berildi. Sondyqtan, jańa shańyraqta tek qana ósip-ónip, baqytty ómir súrýlerińizge tilektespin!» - dedi Baqyt Nasyrhanuly.
Atalǵan úıler Myrzakent kentiniń jańa móltek aýdanynda ornalasqan. Byltyr Maqtaaral aýdanyndaǵy topan sýdan zardap shekken turǵyndarǵa kómek kórsetý úshin alǵashqylardyń biri bolyp Bolat Ótemuratov qory 6 mıllıon AQSh dollaryn bólip, apat saldarynan baspanasyz qalǵan 150 otbasyǵa úı salyp bergen bolatyn.
Mine, sol úılerden artylǵandary úı kezeginde turǵan otbasylarǵa berilip otyr. Buǵan deıin dál osy Myrzakenttiń jańa móltek aýdanynan qurylysy aıaqtalǵan 16 turǵyn úı kezekte turǵan azamattarǵa kommýnaldyq arendalyq maqsatta berilgen edi.
Budan bólek, 2020-2025 jyldarǵa arnalǵan «Nurly jer» baǵdarlamasy aıasynda respýblıkalyq bıýdjetten bólingen 417,9 mıllıon teńge qarjyǵa aýdan aýmaǵyndaǵy kópbalaly az qamtylǵan jáne turǵyn úı kezeginde turǵan otbasylarǵa 50 úı berildi.
Osylaısha bıyldyń ózinde 76 maqtaaraldyq otbasy memlekettik baǵdarlamalar arqyly jáne jeke qorlardyń esebinen baspanaly bolyp otyr.
