Maqtaaralda mol ónim jınaǵan sharýa Reseıge qyryqqabat eksporttady
TÚRKІSTAN. QazAqparat - Túrkistan oblysy, Maqtaaral aýdanynda turatyn sharýa erte kóktemde ónimin aldy. Qyryqqabat daqylynyń birneshe sortyn ekken sharýa qojalyǵy gektaryna 400 tsentnerden ónim jınaǵan, dep habarlaıdy QazAqparat tilshisi.
Dıqan mundaı jetistikke tamshylatyp sýǵarý tehnologııasy arqyly qol jetkizip otyr. Bul týraly qojalyq basshysy Batyr Haıdarov aýdan ákimdiginiń uıymdastyrýymen ótken semınar-keńeste málimdedi.
«Vesna» sharýa qojalyǵynyń tájirıbesin basqalarǵa úıretý maqsatynda ótken semınar-keńeske aýdandyq aýyl sharýashylyǵy bóliminiń basshysy men mamandary, aýyldyq okrýg ákimderi men orynbasarlary, aýyldyq okrýg ákimdikteriniń aýyl sharýashylyǵy boıynsha mamandary jáne sharýa qojalyqtary qatysty.
Semınarda sóz sóılegen sharýa 6,6 gektar jerge qyryqqabat daqylynyń birneshe sortyn ekkenin aıtady. Onyń ishinde «Pekın» sorty erte pisip shyqqan. Qazirgi tańda 2 gektardan 85 tonna ónim alyp, barlyǵyn da Reseıge eksporttaǵan. Tamshylatyp sýǵarý tehnologııasyn paıdalanǵan qojalyq basshysy osylaısha zor paıdaǵa kenelgenin atap ótti.
«Tamshylatyp sýǵarý tehnologııasyn endirý úshin gektaryna 1 mln teńgege jýyq shyǵyn jumsadym. Sonyń arqasynda ekken eginim bitik ári ónimdi bolyp, erte pisip jetildi. Qazir qyryqqabattyń kelisin 120 teńgeden saýdalap jatyrmyn», - dedi sharýa Batyr Haıdarov.
Aıta keteıik, bıyl Maqtaaral aýdanynda 281 gektar jerge qyryqqabat daqyly egilgen. Qazirgi tańda erte pisip jetiletin daqyldan 260 tonna ónim jınalǵan.
