Maqtaaralda mas adam blokpostta turǵan polıtseıge baǵynbaı, uryp-soqqan
MAQTAARAL. QazAqparat - Maqtaaralda aýyl turǵyny blokposttaǵy polıtseıge baǵynbaı, kúsh kórsetti, dep habarlaıdy QazAqparat Túrkistan oblystyq polıtsııa departamentine silteme jasap.
Maqtaaraldaǵy blokpostta polıtseıler men medıtsına qyzmetkerleri kúsheıtilgen rejımde táýlik boıy qyzmet atqaryp júr. Osyndaı kezekti jumys kúni Maqtaaral aýdany Atakent kentine qoıylǵan blokpostta óz mindetin atqaryp turǵan polıtsııa qyzmetkerine jergilikti mas turǵyn kelgen.
«Ol polıtsııa qyzmetkeriniń tyıym salynǵan aýmaqqa kirýge bolmaıtyny týraly eskertýine qulaq aspaǵan. Atalǵan turǵyn tártip saqshysynyń zańdy talabyna baǵynbaı, kópshiliktiń kózinshe jarııa túrde, ar-namysyna tıetin balaǵat sózder aıtyp qorlaǵan jáne qyzmettik mindetin atqaryp turǵanyna qaramastan keýde tusynan qolymen uryp-soǵyp, dene jaraqatyn salǵan» dep habarlaıdy polıtsııa.
Atalǵan jaıt boıynsha QR QK 380-baby boıynsha sotqa deıingi tergeý bastaldy. Turǵyn qamaýǵa alyndy.
