Maqtaaralda «Kúz arýy – 2019» baıqaýy ótti
MAQTAARAL. QazAqparat – Túrkistan oblysy Maqtaaral aýdanynda «Kúz arýy – 2019» baıqaýy ótti. «Jastar jyly» aıasynda qazirgi qazaq qyzdarynyń jan dúnıesindegi kórkemdik talǵamyn qalyptastyryp, ulttyq tárbıege laıyqty sulý bolmysyn tanytýǵa baǵyttalǵan baıqaýǵa aýdandaǵy kentter men barlyq aýyldyq okrýgterden 11 arý qatysty, dep habarlaıdy QazAqparat tilshisi.
Saıys erejesi boıynsha qatysýshylar «Sálem – sózdiń anasy», «Óleń – sózdiń patshasy», «Zerdeliniń oıy ozyq», «Qazaq qyzy – shańyraqtyń shyraqshysy» jáne «Men qazaq qyzdaryna qaıran qalam» atty syndardan ótti.
Arýlar sóz mádenıetin tanytyp, ulttyq kıimder úlgisi men ónerin, bilim deńgeıin kórsetti. Ulttyq dástúr men mádenıetti, ádet-ǵurypty boıyna jınaqtaǵan zerdeli de zerek arýlar qoǵamdaǵy qazaq qyzdarynyń róli týraly oılaryn jetkizdi.
Baıqaý sońynda qarsylastarynan qara úzip, ozyq shyqqan jeńimpazdar men júldeli orynǵa ıe bolǵan boıjetkenderdi aýdan ákimi Baqyt Asanov marapattady.
Al, ózge qatysýshylarǵa «Kórermen kózaıymy», «Parasatty arý» jáne «Ónerli arý» syndy nomınatsııalar berilip, olar uıymdastyrýshylar dıplomyna ıe boldy. Sondaı-aq, baǵaly syılyqtarmen marapattaldy.
