Maqtaaralda quny 1 mlrd teńgeni quraıtyn logıstıka ortalyǵy salynyp jatyr

TÚRKІSTAN. QazAqparat - Túrkistan oblysynyń Maqtaaral aýdanynda 200 oryndyq jańa mektep ashyldy, dep habarlaıdy QazAqparat oblys ákiminiń baspasóz qyzmetine silteme jasap.

«Túrkistan óńiri - halyq tyǵyz ornalasqan aımaq. Týý kórsetkishi de joǵary. Máselen, bıyldyń ózinde oblys boıynsha birinshi synypqa 55 myńnan astam oqýshy barady. ıAǵnı, oqýshy sany 19 myńǵa artqan. Demografııalyq ósimge baılanysty 2018-2025 jyldar aralyǵynda óńirde 184 mektep salý qajettiligi týyndap otyr. Bıyl bilim berý salasyna qajetti 83 nysannyń qurylysy qolǵa alynǵan. Onyń 40-y jyl sońyna deıin paıdalanýǵa beriledi. Mine, búgin de Maqtaaral aýdanynda jańa mektep ashylyp, aýyl oqýshylaryna esigin ashty», - dedi Janseıit Qanseıituly.

Sonymen qatar, oblys ákimi Maqtaaral aýdanyndaǵy Azattyq aýylynda ornalasqan logıstıkalyq ortalyqqa aıaldady. Agrarly aýdanda sharýalardyń ónimin saqtap, ári qaraı satý úshin qolaıly jaǵdaı jasaý maqsatynda qolǵa alynǵan jobaǵa 9 gektar jer telimi qarastyrylǵan. Ortalyqta jańa úlgidegi jemis-jıdek saqtaý jáne ýaqytsha suryptaý qoımalary, muzdatqysh kamera men júk kólikterine arnalǵan turaqjaı, tehnıkalyq qyzmet kórsetý stansasyn salýǵa jalpy quny 1 mıllıard teńgege jýyq ınvestıtsııa tartý kózdelgen.

Aldaǵy ýaqytta avtoparkıng, elektrondy tarazy, júk saqtaý qoımalary, turaqjaı, qujattandyrý ortalyǵy, qonaq úı, ashana, saýda úıi, avto jýý orny salynady.