Maqtaaralda kásipkerlerdiń máselelerin sheshý joldary talqylandy
MAQTAARAL. QazAqparat – Túrkistan oblysy ákiminiń orynbasary Meıirjan Myrzalıev bastaǵan birqatar basqarmalar men qarjy uıymdarynyń basshylary maqtaaraldyq kásipkerlermen kezdesti. Jıynǵa aýdan ákimi Baqyt Asanov pen orynbasarlary, aýyldyq okrýg ákimderi men kásipkerler, sharýa qojalyqtardyń basshylary qatysty, dep habarlaıdy QazAqparat tilshisi.
Negizgi maqsaty - kásipkerlik salasyn damytý, beriletin nesıe túrleri men paıyzdyq ústemeleri jaıynda keńinen maǵlumat berý, kásipkerlik sýbektilerinde kezdesetin qıyndyqtardy sheshý joldaryn birigip talqylaý bolyp tabylatyn jıyn erkin formatta ótti. Maqtaaraldyq kásipkerler tarapynan qoıylǵan suraqtarǵa oblystyq kásipkerlik jáne ınvestıtsııa tartý basqarmasynyń jáne oblystyq qarjy ınstıtýttarynyń basshysylary jaýap berdi. Jıyn barysynda «Atameken» Ulttyq kásipkerlik palatasy Maqtaaral aýdandyq fılıalynyń dırektory Nurgúl Perdebaıqyzy aýdanda teri óndirý isin qolǵa alý jaıyndaǵy usynysyn aıtyp, beriletin nesıelerdiń sommasyn kóbeıtý, qarjy mekemeleri tarapynan sharýalar kepilge qoıǵan jyljymaıtyn múlikterdiń tym tómen baǵalanýyn retteý jaıyndaǵy ótinishin jetkizdi. «Biz jattandy baıandamany oqyp, esep úshin qydyryp kelgen joqpyz. Bizder osyndaǵy kásipkerlerdiń kezdesetin kedergilerin sheship, ol kisilerge kómek berý úshin, qarjylyq, zańdyq kómekter berý úshin keldik. Sizderdiń kásipkerlikpen aınalysqandaryńyz birinshi kezekte otbasylyq turmystaryńyzdyń jaqsarýyna, ekinshiden elimizdiń ekonomıkalyq damýyna oń yqpal etedi. Sondyqtan da, biz sizderge kez-kelgen ýaqytta kómek berýge daıynbyz», - dedi Meıirjan Myrzalıev. Oblys ákiminiń orynbasary jıynda aıtylǵan árbir másele men ótinish-tilekter boıynsha tıisti jumystar júrgizilip, oń sheshimin tabatynyn atap ótti.
