Maqtaaralda iz-túzsiz ketken 18 jastaǵy boıjetken Saryaǵashtan tabyldy
MAQTAARAL. QazAqparat - Túrkistan oblysynda joǵalyp ketken 18 jastaǵy qyz 116 shaqyrym jerden tabyldy, dep habarlaıdy QazAqparat oblystyq polıtsııa departamentine silteme jasap.
Maqtaaral aýdanynyń polıtsııa bólimine jergilikti turǵyn aryzdanyp, 18 jastaǵy qyzynyń 11:40 shamasynda kórshisiniń úıine shyǵyp ketip, sodan qaıta oralmaǵanyn aıtyp aryzdanǵan. Qyzdyń jaqyndary kórshilerinen surastyryp, týystaryna habarlasyp óz kúshimen izdegen.
Alaıda nátıje shyqpaǵan soń polıtsııa qyzmetkerlerine habar bergen.
Atalǵan jaıtty birden tirkeýge alǵan polıtsııa qyzmetkerleri iz-tússiz ketken qyzdy tabý úshin oblys kóleminde barlyq qala, aýdandardyń polıtsııa basqarmalaryna baǵyttama beredi.
Sonymen qatar maqtaaraldyq jedel ýákilder isti tez arada ashý úshin oblysqa qarasty aýdandarǵa shyǵyp, qyzdy izdestire bastaıdy.
Polıtseılerdiń tabandy izdestirý jumystarynyń nátıjesinde 18 jasar qyz 116 shaqyrym jerdegi Saryaǵash qalasyndaǵy ashanalardyń birinen tabyldy.
Belgili bolǵandaı, kámelet jasyndaǵy qyz úıinen óz erkimen shyǵyp ketip, aqsha tabamyn degen nıetimen eshkimge aıtpastan jumysqa kirip alǵan.
Jas qyzben psıholog mamandary sóılesip, túsindirý jumysyn júrgizdi. Osy rette qyzdyń ata-anasy polıtsııa qyzmetkerlerine alǵysyn jetkizdi.
