Maqtaaralda evakýatsııalanǵan ár otbasyna 1 myń AQSh dollarynan berile bastady
MAQTAARAL. QazAqparat – Tasqynnan zardap shekken maqtaaraldyqtarǵa Álisher Ýsmanovtyń qorynan bólingen qarajat berile bastady. Tótenshe jaǵdaı kezinde evakýatsııalanǵan 5202 otbasynyń jeke shotyna 1 myń AQSh dollarynan aýdarylýda, dep habarlaıdy QazAqparat tilshisi.
Búginde evakýatsııalanǵan maqtaaraldyqtardyń alǵashqy legi qarajatynyń sertıfıkatyn aldy. Aýdanda qarajat alatyn barlyq azamattyń qujaty qabyldanyp jatyr. Qujattar tolyq jınalǵan kezde árbir otbasy ózine tıesili qarjyǵa qol jetkizbek.
«Memleket basshysynyń tapsyrmasymen tasqyn bolǵan aýyldardaǵy 6100 adamǵa 100 myń teńgeden berip jatyrmyz. Tótenshe jaǵdaı kezinde tek sý basqan aýyldar emes, qaýip tóngen eldimeken turǵyndary da kóshirildi. Endigi kezde Álisher Ýsmanovtyń qorynan bólingen 2,3 mlrd teńge evakýatsııalanǵan 5202 otbasyna 422 myń teńgeden (1000 AQSh dollary) úlestiriledi. Bul otbasylarda 30 420 adam bar»,- dedi oblys ákimi Ómirzaq Shókeev.
Aıta keteıik, buǵan deıin reseılik kásipker Álisher Ýsmanov sý tasqynynan zardap shekken Maqtaaral aýdanynyń evakýatsııalanǵan turǵyndary úshin «Túrkistan» áleýmettik damý korporatıvtik qoryna 5,2 mln AQSh dollaryn aýdarǵan bolatyn.
