Maqtaaralda bos jumys oryndarynyń jármeńkesi ótti
MAQTAARAL. QazAqparat – Túrkistan oblysy Maqtaaral aýdanynda bos jumys oryndarynyń jármeńkesi ótti. Jıyn barysynda qysqa merzimdi kásibı oqýyn aıaqtaǵan 127 azamatqa kýálik saltanatty túrde tabystaldy, dep habarlaıdy QazAqparat tilshisi.
Atakent kentindegi «Dostyq» mádenıet úıinde ótken sharada 2017–2021 jyldarǵa arnalǵan «Eńbek» memlekettik baǵdarlamasynyń birinshi baǵyty aıasynda óz kásibin ashyp, jumys júrgizip jatqan azamattarǵa qoldaý kórsetildi. Saltanatty jıynǵa «Nur Otan» partııasy Maqtaaral aýdandyq fılıaly tóraǵasynyń orynbasary Dosym Asabaev pen aýdandyq halyqty jumyspen qamtý ortalyǵynyń dırektory Ádil Jumadillaev, isker azamattar men oqý ortalyqtarynyń basshylary jáne jańadan kásipker atanǵan azamattar qatysty.
Aýdan kóleminde uıymdastyrylǵan jármeńkede baǵdarlamanyń úshinshi baǵyty «Eńbek resýrstarynyń utqyrlyǵyn arttyrý» boıynsha jumys kúshi tapshy óńirlerge kóshirý arqyly jumysqa ornalastyrý máselesi qamtyldy. Jergilikti turǵyndardyń nazaryna Soltústik jáne Shyǵys Qazaqstan óńirlerindegi bos jumys oryndarynyń tizimi jáne baǵdarlamadan tys aýdanda jańadan ashylǵan jumys oryndary usynyldy. Jıyn barysynda aǵymdaǵy jyly kóshý arqyly jumysqa ornalasqan otbasylarǵa, memleket tarapynan jasalǵan jaǵdaı jóninde tanystyryldy.
Sonymen qatar, aýdanda probatsııa esebinde turǵan azamattarǵa halyqty jumyspen qamtý ortalyǵy men aýdandyq probatsııa qyzmeti birlesip atqarǵan jumystar júıesi túsindirildi.
Jańadan ashylǵan probatsııa úıinde kórsetiletin qyzmetter men probatsııa ortalyǵynyń is barysy týraly aıtylyp, atalǵan sanattaǵy azamattarǵa jáne aýdandaǵy múmkindigi shekteýli azamattarǵa qaralǵan bos jumys oryndary da usynyldy.
