Maqtaaralda bıyl 1000-nan astam turǵyn gazben qamtylady
TÚRKІSTAN. QazAqparat - Túrkistan oblysynyń ákimi Ómirzaq Shókeev jumys saparymen Maqtaaral aýdanyna bardy, dep habarlaıdy óńir basshysynyń baspasóz qyzmeti.
Eń áýeli ol Azattyq eldi mekenindegi «Megagorstroı» JShS saýda logıstıkalyq ortalyǵyna aıaldady. Joba 352,8 mln. teńgege jeke qarajat esebinen salynǵan. Jer kólemi - 3,7 ga. Ortalyqtyń qurylysy áli júrgizilip keledi. 1-kezeńde avtoturaq, pavılon, ákimshilik ǵımaraty, tarazy, dúken salynǵan. 2-kezeńde qoıma, qonaq-úı, tehnıkalyq qyzmet kórsetý ortalyǵy, avtokólik qosalqy bólshekter dúkeni salynady.
Budan soń oblys basshysy Azattyq eldi mekenin tabıǵı gazben qamtamasyz etý júıesi qurylysymen tanysty. Bas merdiger - «Spets-Teh 1» JShS. Jobanyń jalpy quny - 112,1 mln teńge, qurylys jumystary aǵymdaǵy jyly qyrkúıekte aıaqtalady. Іske qosylǵan kezde 145 abonent, ıaǵnı 1040 adam kógildir otynmen qamtylady. Jobamen tanysqan Ómirzaq Estaıuly aýdandaǵy eldi mekenderdi kezeń-kezeńimen tolyqqandy tabıǵı gazben qatar, aýyz sýmen, elektr qýatymen qamtamasyz etý jumystaryn júıeli túrde júrgizý qajettigin tapsyrdy.
Oblys ákimi Maqtaaral aýdanyna sapary aıasynda «Atameken» keden beketiniń «Syrdarııa» beketiniń jumysyn kórdi. Atalǵan beket Qazaqstan men Ózbekstan elderi arasynda ornalasqan. Jalpy 4 keden qyzmetkeri jumys isteıdi. Keden jumysymen tanysqan Ómirzaq Shókeev «Atameken» keden beketi janyndaǵy 45 gektar jer telimin abattandyrýdy tapsyrdy.
Sapar aıasynda Maqtaaral aýdanynyń ákimi Baqyt Asanov aýdandy damytý maqsatynda iske asyrylatyn jobalarmen tanystyrdy. Onyń ishinde, smetalyq quny 112 mln 888 myń teńgeni quraıtyn qurylys salasy boıynsha 4 joba, 4 sport nysany, abattandyrý boıynsha 22 joba, jalpy aýdan boıynsha smetalyq quny 838 mln 152 myń teńgege 37 joba qolǵa alynbaq. Aýdan basshysynyń baıandamasyn tyńdaǵan oblys ákimi aýdan ortalyǵynda tıptik mádenıet úıi men halyqqa qyzmet kórsetý ortalyǵy ǵımarattaryn salý qajettigin tapsyrdy. Sondaı-aq, Myrzakent pen Atakent kentterine káriz júıesin júrgizý men kóriktendirý-abattandyrý jumystaryn júrgizýdi júktedi. Sonymen qatar, memlekettik-jekeshelik áriptestik aıasynda kásipkerler esebinen aýdan ortalyǵyna qajetti nysandardy salýdy qolǵa alý kerektigin aıtty.
