Maqtaaralda bir jasar sábı sý toly ydysqa qulap ketti
NUR-SULTAN. QazAqparat – Sýǵa túsý maýsymy aıaqtalǵanymen qaıǵyly oqıǵalar áli de bolyp jatyr. Bul týraly Tótenshe jaǵdaılar komıtetinde ótken brıfıngte aıtyldy, dep habarlaıdy QazAqparat tilshisi.
«Bizdiń memleket jer kólemi jaǵynan álem boıynsha toǵyzynshy orynda. Jer aýmaǵymyz úlken bolǵandyqtan, elimizdiń keı óńirlerinde kún áli de jyly. Túrkistan oblysy Kentaý qalasyna qarasty Shashtóbe aýylynyń shetindegi sý qoımasynan 1973 jyly týǵan azamattyń máıiti tabyldy. Ol shomylýǵa tyıym salynǵan jerde sýǵa túsip, 16:00-de batyp ketken. Kýágerlerdiń aıtýynsha, ol mas bolǵan», - deıdi QR ІІM Tótenshe jaǵdaılar komıtetiniń tóraǵasy Vladımır Bekker.
Sondaı-aq, Túrkistan oblysy Maqtaaral aýdany Jalyn aýylynda ata-anasynyń kózinen tasa qalǵan qyz bala 30 lıtr sý quıylǵan ydysqa qulap ketken.
«2018 jyly týǵan búldirshin aýrýhanaǵa jetkizildi. Qazirgi ýaqytta jaǵdaıy aýyr», - deıdi ol.
Vladımır Bekker kishkentaı balalary bar otbasylarǵa keńes berdi.
«Biz úıinde kishkentaı balasy bar adamdarǵa abaı bolyńyzdar dep jıi aıtamyz. Ata-ana balany úıde jalǵyz qaldyrǵan kezde oǵan qandaı qaýip tónetinin saralaı bilýi kerek. Kishkentaı balalar qorshaǵan ortasyn tanyp-bilgisi kelgendikten kóp qozǵalady. Kózden tasa qylsań, birdeńeni búldirip qoıýy múmkin», - deıdi komıtet tóraǵasy.
