Maqtaaralda besik toı jasap, 80 qonaq shaqyrǵan turǵyn aıyppul tóleıdi
Qazirgi tańda koronavırýs indetine baılanysty elimizde karantın rejımi engizilgeni barshamyzǵa belgili.
Osyǵan qaramastan, oblys turǵyndary aǵaıyn-týys, dos-jarandaryn shaqyryp, ulan-asyr toı jasaýyn toqtatar emes.
Osy tusta karantın talaptarynyń saqtalýyn qadaǵalaý maqsatynda qurylǵan arnaıy mobıldik toptar, toı-jıyndarǵa jınalǵan kópshilikti tarqatýda.
Bul baǵyttaǵy jumys turaqty júrgizilýde.
Máselen, Maqtaaral polıtsııa qyzmetkerleri saǵat 11:40 shamasynda Maqtaaral aýdanynyń kósheleriniń birinde ornalasqan toıhanada besik toıyn ótkizip jatqanyn anyqtady.
Toıǵa 80-nen astam adam jınalǵan.
Mobıldi top turǵyndarǵa túsindirme jumystaryn júrgizip, toıdy der kezinde toqtatyp, adamdardy úılerine tarqatty.
Karantın talaptaryn elemegen toı ıesine qatysty QR ÁQBtK-niń 425-baby boıynsha is-qujattar jınaqtalyp, zańdy sheshim qabyldaý úshin Maqtaaral aýdandyq SEBB-ǵa joldandy.
Óz kezeginde Túrkistan oblysynyń polıtseıleri barlyq azamattarǵa karantın kezinde saqtyq sharalardy ustanyp, adamdar kóp shoǵyrlanǵan jerlerge barmaýdy, basqosýlar men toı-jıyndardy jasamaýdy eskertedi.
Karantın eskerilmeı, quqyq buzýshylyqqa jol berilgen jaǵdaıda, zań aıasynda jaýapkershilik qarastyrylǵan.
Sondyqtan nemquraıdylyq tanytpaı, óz saýlyqtaryńyz úshin karantın talaptaryn ustanǵandaryńyz jón.