Maqtaaralda aýyldardyń bas jospary ázirlenip jatyr

MAQTAARAL. QazAqparat – Túrkistan oblysynyń Maqtaaral aýdanynda 2 kent jáne 28 eldi meken ońaılatylǵan bas josparmen qamtylǵan bolatyn. Al, bıyl sáýlet, qala qurylysy jáne qurylys bólimi tarapynan qalǵan 39 aýyldyń bas jospary jasalýda, dep habarlaıdy QazAqparat tilshisi.

Bul jumystarǵa jergilikti bıýdjetten qarjy qarastyrylyp, barlyq eldi mekenderdiń bas jospary ázirlenip jatyr. Aýdanda jalpy sany 2 kent pen 67 eldi meken bar bolsa, olardyń basym kópshiliginde abattandyrý jumystaryn júrgizý kózdelgen. Máselen, Myrzakent kentiniń aýmaǵyn ulǵaıtýǵa arnalǵan 160 gektar jer telimine jáne Jambyl eldi mekeniniń aýmaǵyndaǵy «Atameken» keden beketi mańyndaǵy 45 gektar jer telimderine de egjeı-tegjeıli josparlaý jobasy jasalynýda.

Aýdannyń sáýlet, qala qurylysy jáne qurylys bólimi Myrzakenttegi Qojanov kóshesi boıyn kógaldandyrý, abattandyrý jáne jaryqtandyrý boıynsha eskızdik joba daıyndaǵan.

Sonymen qatar, Myrzakent kentindegi ortalyq alleıanyń, aýdandyq mádenıet úıiniń, ortalyq saıabaqtyń, «Jeńis» alańynyń eskızdik jobalar ázirlenip, aýdan ákimdigine usynyldy. Dál osyndaı jumystar Jańa jol aýyldyq okrýgi, Aqjol eldi mekeniniń Qazybek bı kóshelerin abattandyrý, jaryqtandyrý úshin de jasaldy. Búgingi tańda osy jobalar boıynsha abattandyrý jumystary júzege asyrylýda.