Maqtaaralda aýlalardy jańbyr sýynan tazartý jumysy kúndiz-túni júrip jatyr
TÚRKІSTAN. QazAqparat - Maqtaaraldaǵy aýlalardy jańbyr sýynan tazartý jumystary kúndiz-túni júrip jatyr, dep habarlaıdy QazAqparat tilshisi.
Túrkistan oblysynyń Maqtaaral jáne Jetisaı aýdandarynda tolassyz jaýǵan jaýyn-shashynnyń saldaryn joıý jumystary jalǵasýda.
Ákimdik, tótenshe jaǵdaı depertamenti, jalpy turǵyndar men erikti jastar kúsh jumyldyryp, eldi mekenderdi sý tasqyny saldaryn joıý jáne aldyn alý baǵytynda eńbektenip jatyr.
Aýdannyń Jastar resýrstyq ortalyǵynyń bastamasymen aýdannyń eriktileri de sý tartý jumystaryna tynbaı qolǵabys jasaýda.
Olar motopompalardy tasý, onyń jumysyn uıymdastyrý, aryq-atyzdardy tazalaý syndy kezek kúttirmeıtin jumystardy belsendilikpen atqarýda.
Maqtaaral agrarlyq kolledjiniń «Azamat» eriktiler toby bastaǵan qaıyrymdylyq estafetasy kentter men okrýgterde tolyqtaı qoldaý týyp, jastar tarapynan 300-ge jýyq erikti qoldaryna kúrek aldy.
Eriktiler jasaǵy kúndizgi jáne túngi kezek boıynsha jumystardy bólisip isteýde.
Al, qos aýdannyń depýtattary 10 mıllıon teńgege jýyq qarjy jınap, uıymdastyrý jumystaryna qoldaý kórsetken.
Sonymen birge tehnıkalar men sý soratyn qurylǵylardy, motopompalar satyp ápergen jáne jaldap berý qundaryn tóleýde.
Janar-jaǵarmaı alýǵa da turaqty qoldaý kórsetýde. Óz esebinen 3 tonnaǵa deıin janar-jaǵarmaı usynǵan azamat ta bar.
Qazirgi tańda Maqtaaral aýdanynda tolassyz jaýǵan jańbyrǵa baılanysty 110 dana tik drenajdy uńǵymalar jumys istep tur.
16 dana tik drenajdy uńǵyma aýdandaǵy qazirgi ahýalǵa baılanysty shuǵyl jóndeýden ótip, iske qosylǵan.
Al, jergilikti ákimdiktiń habarlaıynsha Maqtaaral aýdanynyń Ózbekstan Respýblıkasymen shekarasynda ornalasqan Ortalyq Myrzashól kollektorynda da sýdyń deńgeıi tómendegeni baıqalady.
