Maqtaaralda apattan kelgen shyǵyn kólemi eseptelýde
MAQTAARAL. QazAqparat – Maqtaral aýdanyndaǵy sý tasqynyna baılanysty 2243 azamat qaýipsiz aımaqqa evakýatsııalandy. Bul týraly onlaın brıfıng kezinde Tótenshe jaǵdaılar departamentiniń basshysy Nurǵalı Júnisov málimdedi, dep habarlaıdy QazAqparat tilshisi.
Departament basshysynyń aıtýynsha, sýdan qaýip tóngen Nurly jol men Ferdoýsı aýyldarynan 415 úıdiń 3200-den astam turǵyny da qaýipsiz aımaqqa shyǵarylǵan. Jalpy osy sátke deıin 5400 turǵyn qaýipsiz jerge ornalastyrylǵan.
«Jalpy sý tasqyny aýdan boıynsha 4 eldi mekenge qaýip tóndirdi. Bul degenimiz 4624 halyq tirshilik keship jatqan 868 úı sý astynda qalýy múmkin edi degen sóz. Alaıda, qazir der kezinde qolǵa alynǵan sharalardyń arqasynda qaýiptiń beti qaıtty. Tótenshe jaǵdaıǵa baılanysty 18 evakýatsııalyq oryndar daıyndaldy. Olar: Atakent, Maqtaral, Jambyl eldi mekenderinde ornalasqan. Apattan qutqarý jumystaryna 630 adam, 2 sý kóligi jáne 56 tehnıka jumyldyryldy. Qajetti sharalar tıisti deńgeıde atqarylyp jatyr», – dedi Nurǵalı Júnisov.
Sondaı-aq, onlaın brıfıngte aýdan ákimi Baqyt Asanov qaýipsiz aımaqqa kóshirilgen turǵyndardyń jaǵdaıyn aıtyp ótti.
«Evakýatsııalanǵan aýyl turǵyndary mektepterge jaıǵastyryldy. Koronavırýs indetiniń taralýynyń aldyn alý úshin evakýatsııalanǵan azamattarǵa medıtsınalyq betperde men antıseptıkter taratyldy. Qazirgi tańda tótenshe jaǵdaıdan kelgen shyǵyn kólemin esepteý jumystary júrgizilýde», – dedi Baqyt Asanov.
Aıta keteıik, qazir aýdan ortalyǵy Myrzakent kentinde qaýip kúsheıýine baılanysty turǵyndar evakýatsııalandy. Bul jumystarǵa kórshi jatqan Keles, Jetisaı, Shardara, Saryaǵash aýdandarynyń ákimshiligi atsalysýda.
