Maqtaaralda apat kezinde ólgen mal men búlingen eginniń shyǵyny óteledi
MAQTAARAL. QazAqparat - Maqtaaral aýdanynda jalpy kólemi 7639 gektar aýyl sharýashylyǵy jerleri zaqymdanǵan. Al mal shyǵyny - 297 bas, dep habarlaıdy QazAqparat óńirlik kommýnıkatsııalar qyzmetine silteme jasap.
Barlyq shyǵyndar eseptelip, Úkimetke usynyldy. Aldaǵy ýaqytta ótemaqy jasalady. Bul týraly óńirlik kommýnıkatsııalar qyzmetin ótken brıfıngte oblystyq aýyl sharýashylyǵy basqarmasynyń basshysy Nurbek Badyraqov málimdedi.
«Aýdanda 11 eldimekenniń egistikteri zaqymdanǵan. Jalpy 1 myńnan astam aýyl sharýashylyǵy taýar óndirýshileriniń tizimi jasaldy. Biz 7639 gektar egistiktiń shyǵynyn 4 mlrd 1 mln teńge kóleminde eseptep, Úkimetke usyndyq. Komıssııa sheshimi boıynsha ár daqyl túrine oraı ótemaqy jasalady. Al veterınarııalyq jaǵdaı boıynsha 297 mal zardap shekken: 58 bas sıyr, 227 qoı-eshki, 16 jylqy, 2 túıe jáne 227 úı qustary sýǵa aqqan. Barlyǵyn joıý jumystary júrip jatyr. Mal shyǵynyn óteý úshin naryqtaǵy baǵa boıynsha 32 mln teńge shyǵyndy eseptep, usynyp otyrmyz», - dedi basqarma basshysy.
Basqarma mamandary ólgen ár maldyń fotosyn túsirip, aktisin daıyndaýda. Mal men eginniń ótemaqysy tótenshe jaǵdaıǵa baılanysty ashylatyn azamattardyń jeke shotyna aýdarylady. Qosymsha shot ashýdyń qajeti joq.
Sý tartylǵannan keıin aýyl sharýashylyǵy mınıstrliginen arnaıy mamandar kelip, jerdiń quramyn, zaqymdanǵan kúıin tekseredi.
