Maqtaaralda ánshi Gaýhar Álimbekovanyń kontserti ótti
MAQTAARAL. QazAqparat – Ánshi Gaýhar Álimbekova óziniń týǵan jeri Maqtaaral aýdanynyń «Dostyq» mádenıet úıinde shyǵarmashylyq kontsertin ótkizdi. Mádenı is-sharaǵa aýdan ákiminiń orynbasary Beısenbaı Tórebekov qatysyp, ánshige degen jyly lebizin jetkizdi, dep habarlaıdy QazAqparat tilshisi.
Shyǵarmashylyq keshte Beısenbaı Tórebekov quttyqtaý sóz sóılep, óner adamyna degen el yqylasyn jetkizdi. Ánshini arnaıy alǵys hatpen marapattap, syı-sııapatyn tabystady.
«Gaýhar lırıkany jaqsy kóredi. Onyń muńǵa toly ǵajaıyp ánderi tyńdarmanyn elitpeı qoımaıdy. Sezimge toly syrshyl ánder Gaýhardyń qazaq sahnasyndaǵy ózindik ornyn, án álemindegi ózindik mánerin qalyptastyrdy. Sondyqtan, biz jerlesteri, ánshi qaryndasymyzben qashanda maqtanamyz» - dedi Beısenbaı Tasbolatuly.
Aıta keteıik, ánshi-sazger Gaýhar Álimbekova 1971 jyly Maqtaaral aýdanynda dúnıege kelgen. Ol gıtarada oınaýdy 9-synypta oqyp júrgende úırengen. Eń alǵash shyǵarǵan áni «Saǵynysh sazy» dep atalady. Alǵash ret Gaýhar jas sazgerlerdiń «Úkili úmit» baıqaýynda kózge túsip, Israıl Saparbaı, Seken Turysbekov, Murat Qusaıynov aǵalarynyń batasyn aldy.
Onyń repertýaryndaǵy ánderdiń barlyǵy derlik – óz týyndylary. El arasynda Gaýhardyń «Aq bosaǵa», «Kelinge ósıet», «Oralshy, mahabbat», «Kóktemge hat», «Perzent syry», «Kóktemgi jańbyr», «Qyz sezimi» sııaqty ánderi erekshe tanymal. Ásirese, «Aq bosaǵa» men «Kelinge ósıet» kez kelgen toıda shyrqalar hıt ánge aınaldy. Sondaı-aq, «Oralshy, mahabbat» – basqalardan keıinirek jaryqqa shyqsa da, halyqqa birden tanylǵan erekshe án.
