Maqtaaralda ana men bala densaýlyǵyna qatysty jıyn ótti
MAQTAARAL. QazAqparat – Elimizde ana men bala ólimin tómendetý maqsatynda iske qosylǵan Densaýlyq saqtaý mınıstrliginiń «Ámbebap progressıvti patronajdyq modýl» baǵdarlamasyna sáıkes Túrkistan oblysy Maqtaaral aýdanynda alqaly jıyn ótti, dep habarlaıdy QazAqparat tilshisi.
«Qazaqstandaǵy medbıkelik kútimniń qazirgi zamanǵy júıesi» atty semınar-keńeske aýdan ákiminiń orynbasary Beısenbaı Tórebekov pen oblystyq Qoǵamdyq densaýlyq basqarmasynyń ana men bala densaýlyǵyn qorǵaý jónindegi bólim basshysynyń orynbasary Nýrhan Narymbetova, quqyq qorǵaý organdary men aýdandyq derbes bólim basshylary, kentter men aýyldyq okrýg ákimderi qatysty.
Jıynda sóz alǵan Nýrhan Narymbetova «Ámbebap progressıvtik patronajdyq modýl» baǵdarlamasy boıynsha júkti áıel men 5 jasqa deıingi balalardyń densaýlyǵyn baqylaý maqsatynda eki paket jumys júrgiziletinin atap ótti.
«Olar - ýnıversaldy jáne progressıvti paketter. Ýnıversaldy patronajdyq model paketi boıynsha deni saý, ıaǵnı kúndelikti baqylaýdy qajet etpeıtin júkti áıelder men balalar qaralady. Al, progressıvti patronajdyq model paketi aıasynda ártúrli qaýipti toptarǵa kiretin júkti áıelder men 0-5 jastaǵy balalardyń densaýlyǵyna jáne jalpy jaǵdaıyna keri áser etetin jaǵdaılarǵa sektoraralyq mamandardyń baqylaýymen jáne kómegimen júrgiziletin jumystar iske asyrylýy tıis» - dedi N.Narymbetova.
Baıandama barysynda N.Narymbetova ámbebap-progressıvti modeldiń qajettiligine keńinen toqtaldy. Sondaı-aq, jıynǵa qatysýshylar tarapynan qoıylǵan suraqtarǵa jaýap berdi.
