Maqtaaralda alaıaq áıel jumysqa turǵyzamyn dep 30 adamdy aldap, 13 mln teńgeni jymqyrǵan
MAQTAARAL. QazAqparat – Túrkistan oblysy Maqtaaral aýdanynda alaıaq áıel jurtty jumysqa turǵyzamyn dep aldap soqqan. Bas-aıaǵy 30 adamdy sazǵa otyrǵyzǵan alaıaq jábirlenýshilerge mıllıondaǵan shyǵyn keltirgen, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, jergilikti turǵyndardyń biri tártip saqshylaryna aryzdanyp kelgen. Onyń sózinshe, jaqsy tanys emes áıel kez kelgen mektepke jumysqa ornalastyryp beremin dep aldaǵan. Senimine kirip, uly men kúıeýbalasyn jumysqa turǵyzý úshin 1.5 mıllıon teńgege jýyq aqsha bergen. Alaıda artynsha jer sıpap qalǵan.
Ózge aryzdanýshylar da alaıaq áıeldiń «Múgedek balalardy ońaltý ortalyǵyn ashamyn, soǵan medbıke, tárbıeshi, áleýmettik qyzmetker, tehnıkalyq qyzmetker etip jumysqa qabyldaımyn. Ár jumystyń ózindik baǵasy bar» dep aıtqanyn kórsetken. Sóıtip, jábirlenýshilerden 350-600 myń teńge aralyǵynda alǵan.
Ony ustaý úshin aýdandaǵy tájirıbeli polıtseılerden jedel tergeý toby quryldy. Áıeldiń jeke tulǵasy anyqtalyp, bes kún ishinde qolǵa tústi. Ol Shymkent qalasynda turatyn egde jastaǵy áıel bolyp shyqty. Tergeý barysynda kúdikti óz kinásin tolyq moıyndaǵan.
Tergeý barysynda anyqtalǵandaı, ol osylaı alaıaqtyq jolmen 30-ǵa jýyq turǵyndy aldaǵan. Jábirlenýshilerge kelgen shyǵyn kólemi 13 mln teńgeden asady.
Atalǵan jaıt QR QK 190-baby boıynsha tirkelip, sotqa deıingi tergeý júrip jatyr.
