Maqtaaralda 500 úı salynyp jatqan qurylys alańy dezınfektsııalandy
Óńirlik kommýnıkatsııa qyzmetiniń málimetinshe, bul sharalar ártúrli ınfektsııalyq aýrýlardyń el ishinde taralýyna jol bermeı, dalaly jerde kezdesetin qan sorǵysh jándikterdi joıýǵa baǵyttalǵan.
Bul týraly aýdandyq taýarlar men kórsetiletin qyzmetterdiń sapasy men qaýipsizdigin baqylaý basqarmasynyń bólim basshysy Gaýhar Sáýlebekova málimdedi.
«Qazirgi tańda Myrzakent kentinde jańa eldi meken boı kóterip, onda 500-den astam úı salynyp jatqany barshaǵa belgili. Osyǵan baılanysty qaýip-qaterdiń aldyn alý úshin dezınfektsııalap jatyrmyz. Dalaly jerlerde kene, búrge sııaqty zııandy jándikter jıi kezdesetini belgili. Sondyqtan qurylysshylardyń jáne bolashaqta osynda kóship keletin halyqtyń qaýipsizdigi úshin profılaktıkalyq sharalar qajet», – deıdi Gaýhar Shyrynqyzy.
Qurylys alańyna arnaıy daıyndalǵan dárini shashý úshin 3 maman jumyldyrylǵan.
Aıta keteıik, buǵan deıin arnaıy qural-jabdyqpen qamtamasyz etilgen qyzmetkerler sý basqan Fırdoýsı jáne Órgebas aýyldarynda zalalsyzdandyrý jumysyn júrgizgen bolatyn.
Aldaǵy kúnderi qalǵan eldi mekenderde de profılaktıkalyq sharalar qolǵa alynady.
