Maqtaaralda 360-qa jýyq úıdiń qurylysy tolyǵymen aıaqtaldy
TÚRKІSTAN. QazAqparat - Maqtaaralda 360-qa jýyq úıdiń qurylysy tolyǵymen aıaqtaldy, dep habarlaıdy QazAqparat Túrkistan oblysy Óńirlik kommýnıkatsııalar qyzmetine silteme jasap.
Túrkistan oblysynyń Maqtaaral aýdanynda topan sýdan zardap shekken eldimekenderdi qalpyna keltirý maqsatynda 895 úı qaıta salynyp jatyr. Qazirgi tańda 360-qa jýyq úıdiń qurylys jumystary tolyǵymen aıaqtalǵan. Qalǵan baspanalardyń qabyrǵalary qalanyp, shatyry jabylyp jatyr. Oblys ákiminiń orynbasary Meıirjan Myrzalıev aýdanǵa arnaıy is-saparmen baryp, atqarylyp jatqan jumyspen tanysty.
«Jalpy aýdanda salynyp jatqan 895 úıdiń 195-si Órgebas, 314-i Fırdaýsı aýyldarynda, 386-sy Myrzakentte boı kóterýde. Búginde Órgebasta 44, Fırdaýsı eldimekeninde 88, Myrzakent kentinde 227 turǵyn úı qurylysy aıaqtaldy. Jospar boıynsha barlyq úı qazan aıynyń sońyna deıin tolyǵymen salynyp bitýi kerek», – dedi Meıirjan Myrzalıev.
Órgebas jáne Fırdaýsı turǵyndary baspanasyn memlekettiń qoldaýymen ózderi salyp jatyr. Úıdiń qurylys jumysyna ketetin qarajat 3 kezeń boıynsha berildi.
«Ózderińiz kórip otyrǵandaı sý jańa úıge ıe bolyp, qýanyp otyrmyz. Memleket tarapynan, qoǵamdyq qorlardan jáne halyqtan kóptegen túrli kómek berildi. Máselen, árbir otbasyǵa 1 myń AQSh dollaryn, árbir otbasy múshesine 100 myń teńgeden aldyq. Úıdiń qurylysyna ketken qarjy da túgeldeı ótemaqy retinde berildi. Odan bólek, keıbir qurylys materıaly da tegin jetkizildi», – dedi tıisti tólemaqysyn ýaqtyly alyp, jańa úıge kirgen Órgebas aýylynyń turǵyny Gúlsara Eshtaeva.
Al, Myrzakent kentindegi birdeı úlgide salynyp jatqan 386 úıdiń 196-sy Úkimet rezervinen, 190-y qoǵamdyq qorlardyń esebinen júrgizilip jatyr. Sondaı-aq, jańadan qurylǵan móltekaýdanda mektep, balabaqsha, medıtsınalyq ambýlatorııa jáne polıtsııa pýnkti salynyp jatyr.
