Maqtaaralda 3000-ǵa jýyq úıdiń aýlasyn sý basty
TÚRKІSTAN. QazAqparat - Túrkistan oblysy Maqtaaral aýdanynda 3000-ǵa jýyq úıdiń aýlasyn sý basty, dep habarlaıdy QazAqparat tilshisi.
Maqtaaral aýdanynda tolassyz jaýyp jatqan jańbyrdyń saldarymen kúres áli toqtamǵan joq. Qazir óńirde barlyǵy 214 motopompa jumys istep jatyr.
«Turǵyn úılerdiń aýlalaryn sý basý jaǵdaıy óte kóp tirkelýde. Shtab barlyq turǵyn úıge birdeı kómek kórsetýi fızıkalyq turǵydan múmkin emes. Eń birinshi kezekte az qamtylǵan, kóp balaly, múmkindigi shekteýli, jalǵyzbasty analary bar otbasylarǵa kómek kórsetýdemiz. Osyǵan baılanysty barlyq aýdan turǵyndary, kásipkerlerdi, erikti azamattardy oryn alǵan jaǵdaımen birigip kúresýge shaqyramyn», - deıdi aýdan ákimi Baqyt Asanov.
Jalpy aýdanda 3 myńǵa jýyq úıdiń aýlalaryn sý basý jaǵdaıy tirkelgen. Búginge deıin jergilikti ákimdikterdiń jáne oblystyq, aýdandyq tótenshe jaǵdaı qyzmetkerleriniń táýlik boıy atqarǵan jumystarynyń nátıjesinde 15501 kýb jańbyr sýy tartyldy.
Aıta keteıik, eki aptadan beri tynymsyz jaýǵan jaýyn-shashynnan jer asty sýy kóterilip, Maqtaaral aýdanynda birneshe eldimekenderde kósheler men úılerdiń aýlalaryn sý basý jaǵdaılary oryn aldy.
