Maqtaaralda 1300 otbasy 1 myń AQSh dollary kóleminde ótemaqy alǵan
MAQTAARAL. QazAqparat – Maqtaaral aýdanyndaǵy sý tasqynynan zardap shekken turǵyndarǵa Álısher Ýsmanov qorynan 5 mln 202 myń AQSh dollary 5202 januıanyń esepshotyna aýdarylady. Búginde bul qarjyny 1308 otbasy alyp úlgergen, dep habarlaıdy QazAqparat tilshisi.
Oblystyq qarjy basqarmasynyń basshysy Ábdirahman Tasybaevtyń aıtýynsha, turǵyndarǵa búgingi tańda 4638 bank kartasynyń basym bóligi taratylǵan. Tótenshe jaǵdaı kezinde evakýatsııalanǵan 13 aýyldyń turǵyndaryna qarjy aldaǵy kúnderi aýdarylmaq.
«Atap aıtqanda, 1 myń AQSh dollary kólemindegi ótemaqy Myrzakent, Jańaturmys, T.Jaılybaev, Nurly tań, Shuǵyla, Jantaqsaı, Nurly jol, Jeńis, Ferdaýsı, Dostyq, Órgebas, Araıly, Aqjol aýyldarynyń turǵyndaryna úlestirilýde. Ondaǵy halyqtyń tek mekenjaı anyqtamasy ne aýyl turǵyny ekenin rastaıtyn basqa qujaty bolýy kerek», - dedi basqarma basshysy.
Aıta keteıik, buǵan deıin Maqtaaral aýdanyndaǵy sý basqan Jańaturmys, Jeńis, Ferdaýsı, Dostyq, Órgebas eldimekenderinde turatyn ár otbasyna Úkimettiń rezervinen 100 myń teńgeden beriletini aıtylǵan bolatyn. Bul maqsatta Úkimetten 650 mln teńge bólinip, qarajat 846 úıdiń 6128 adamyna tólenedi dep josparlanyp otyr.
