Maqtaaral shekaralyq temirjol beketiniń jumys isteýin tezirek sheshý qajet - Q. Aıtahanov
ASTANA. Qyrkúıektiń 9-y. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda senator Qýanysh Aıtahanov Úkimet basshysynyń atyna saýal joldap, onda Maqtaaral shekaralyq temirjol beketiniń jumys isteýin qamtamasyz etýdi tezirek sheshý qajettigin atap ótti.
Saýal barysynda Q. Aıtahanov osyǵan deıin eki márte Ońtústik Qazaqstan oblysy Maqtaaral aýdanyndaǵy «Maqtaaral» temirjol beketiniń jabylyp qalýyna baılanysty depýtattyq saýaldar joldaǵanyn aıtty. Osyǵan oraı, depýtat Qazaqstan-Ózbekstan arasynda atalǵan másele jóninde kelissóz júrgizý týraly jumystary atqarylyp jatqany týraly jaýap alady.
«Alaıda, arada birneshe ýaqyt ótse de, atalǵan másele óz sheshimin tappaı otyr. Nátıjede, elimizdiń qıyr ońtústiginde ornalasqan 300 myń halqy bar Maqtaaral aýdanyna qajetti azyq-túlik, otyn, qurylys, janar-jaǵarmaı t.b. kerekti materıaldardy jetkizýde jáne ondaǵan myń tonna maqta talshyǵyn eksportqa shyǵarýda jáne basqa da taýarlardy tasýda qıynshylyqtar týyndaýda. Sondyqtan da, máseleni jyldamyraq sheshý úshin Qazaqstan Respýblıkasy men Ózbekstan Respýblıkasy Úkimetteriniń arasyndaǵy memlekettik shekaralyq ótkizý beketi týraly kelisimde jáne hattamada bekitilgen temirjol ótkizý beketteri tizimine Maqtaaral temirjol beketin engizýdi jáne osy shekaralyq temirjol beketiniń jumys isteýin qamtamasyz etýdi tezirek sheshýge yqpal etýińizdi suranamyn», dedi senator.
