Maqtaaral mektepterinde «Adaldyq saǵaty» taqyrybynda dáris ótti

MAQTAARAL. QazAqparat – Túrkistan oblysy Maqtaaral aýdanyndaǵy mektepterde «Adaldyq saǵaty» taqyrybynda dárister ótti. Oǵan aýdan ákiminiń orynbasarlary men apparat basshysy, quqyq qorǵaý organdarynyń basshylary men qyzmetkerleri, aýdan ákimdiginiń mamandary qatysyp, adaldyq týraly oılarymen bólisti, dep habarlaıdy QazAqparat tilshisi.

Dáristi ótkizýdegi maqsat - oqýshylardy adaldyq, ádildik, shynshyldyqqa tárbıeleý boldy. Ár balanyń boıyna adamı qundylyqtardy sińirip, olardyń adam úshin mańyzyn túsindirý, adaldyq pen shynshyldyqqa, ádildikke baǵyttaı otyryp, ádeptilik erejelerin úıretý kózdeldi.

Maqtaaral aýdandyq bilim bóliminiń basshysy Muratbek Serikbaev Q.Muńaıtpasov atyndaǵy jalpy orta mekteptiń oqýshylarymen kezdesý ótkizdi. Kezdesý barysynda adaldyq qazirgi tańda adamdarǵa eń qajetti qundylyq ekeni, adaldyq bolmasa qoǵam quldyraıtyny jóninde áńgime órbidi.

«Adaldyq – adam boıyndaǵy asyl qasıetterdiń biri. Qazaq paıymynda adam boıynda adaldyq - páktik, ar-ujdan, jan tazalyǵy tárizdi t.b. asyl qasıetterdiń jıyntyǵynan turady. Kóshpeli qazaqtardyń adamgershilik, adaldyq qasıetteri turǵysynan kirshiksiz taza, márt bolatyndyǵy týraly sheteldik saıahatshylardyń qoljazbalary men kúndelikterinde jazylǵan. Adamnyń óz ujdany aldynda adal, shynshyl bolý – ózine-ózi qasıetti bolýynan, júris-turysy izgi bolýynan ǵana týady» - dedi M.Serikbaev.