Maqtaaral dıqandary qaýyn-qarbyzdaryn shetelge eksporttaýda
MAQTAARAL. QazAqparat – Jyl saıyn maýsym kezinde Maqtaraldan kún saıyn 200-300-ge tarta qaýyn-qarbyz tıelgen júk kólikteri TMD, Prıbaltıka, Túrkııa, Germanııa, Gretsııa elderine jol tartady. Bıyl aýdan sharýalary 10 myń gektarǵa qaýyn, 1500 gektardan asa qarbyz ekken, dep habarlaıdy QazAqparat aýdan ákimdiginiń baspasóz qyzmeti.
Burynnan baldaı táttiligimen, erekshe úlkendigimen tanymal bolǵan «Myrzashól» qaýynyn eksportqa yńǵaılastyryp, búginde oblystaǵy birneshe aýdandardyń dıqandary jappaı egip jatqan «Jıenbet», «Valet» sııaqty t.b. qaýynnyń sorttaryn jasap shyǵardy.
Jańa sorttardyń dámi til úıiredi jáne tasymaldaýǵa tózimdi, ıaǵnı uzaq jolǵa beıimdelgen. Kólemi de yńǵaıly, bir qorapqa 6-7 qaýyn syıady. Jańa sorttardyń arqasynda sońǵy jyldary dıqandar úlken tabys taýyp, kúlli Reseı men Eýropanyń birneshe elderiniń naryǵyna kirip otyr.
Qazirgi tańda Maqtaaral aýdanynyń kireberisindegi logıstıkalyq ortalyq júk kólikterine lyq tolǵan. Eýropadan jáne basqa da elderden kelgen kásipkerler úshin ortalyqta barlyq jaǵdaı jasalǵan. Atap aıtqanda, qonaq úı, dámhana, avtoturaq, basseın kesheni men qosalqy bólshek dúkeniniń qyzmetteri qarastyrylǵan. Aldaǵy ýaqytta kókónis saqtaý qoımasy da iske qosylady.
Osylaısha qaýyn-qarbyz bıznesi Maqtaaral aýdanynda tutas bir ındýstrııanyń damýyna jol ashyp otyr.
