Maqtaaral dıqandary qant qyzylshasyn shetelge eksporttaýda

TÚRKІSTAN. QazAqparat - Maqtaaral aýdany Qalybekov aýyldyq okrýginiń dıqandary erte pisip jetiletin qant qyzylshasynyń alǵashqy ónimin Reseıge eksporttaýdy bastady, dep habarlaıdy QazAqparat tilshisi.

Jańajol aýylynyń turǵyndary Gollandııadan arnaıy jetkizilgen «pavlo», «vadan» atty qyzylshanyń joǵary surpyn qańtar aıynda úı irgesindegi alqapqa ekken bolatyn.

Qazir shetelge eksporttaýdy bastady.

«Qyzylsha egiletin jer óte qunarly bolýy tıis. Ol úshin selıtra, ammofos, maldyń qılary arqyly jer tyńaıtylady. Agrotehnıkalyq sharalardyń basym bóligi qoldyń kúshimen isteletindikten qyzylsha egý úshin qajyrly eńbek kerek. Úlken eńbektiń sońy – úlken tabysqa alyp keledi», – deıdi sharýa Bektemin Alıqulov.

Sharýa alǵash ret úı irgesindegi 15 sottyq jerinen 1,5 tonna ónim aldy. Qazirgi tańda kelisin 180 teńgeden saýdalap jatyr.

«Qyzylshanyń «pavlo», «vadan» sorttary tek Jańajol aýylynyń topyraǵynda ósip shyqqanda ǵana erekshe dámge ıe bolady. Sondyqtan, munda qyzylshaǵa joǵary suranys bar», - deıdi ol.

Jalpy okrýg aýmaǵynda sharýalar Reseıge jáne elimizdiń Nur-Sultan, Almaty, Qaraǵandy qalalaryna ónimderin jóneltip otyr.

Qant qyzylshasyn tolyq jınap alǵan soń dıqandar ekinshi ónim retinde malǵa azyq bolatyn daqyldardy egýdi josparlap otyr.