Maqtaaral aýrýhanalarynda koronavırýspen aýyrǵan naýqas joq
MAQTARAL. QazAqparat - Maqtaaral aýrýhanalarynda COVID-19 ınfektsııasymen aýyrǵan naýqas joq, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.
«Maqtaaral aýdanyndaǵy sý tasqyny barsha jurtty alańdatyp otyr. Qazirgi tańda atalǵan aımaqta 4 eldi mekennen 5 400 adam evakýatsııalandy. Turǵyndardyń birazy týys-týǵanyna ketse, úsh myńǵa jýyǵy Maqtaaral aýdanynyń Atakent kentindegi 10 mektepke bólip ornalastyryldy. Azyq-túlik, ystyq tamaqpen tolyq qamtamasyz etildi», delingen habarlamada.
Kórshiles Jetisaı aýdany COVID-19 ınfektsııasynyń oblystaǵy oshaǵy bolǵandyqtan, kópshilikti osy saýal alańdatýda.
«Oblystyq densaýlyq saqtaý basqarmasynyń málimetinshe, Jetisaı aýdanyndaǵy ınfektsııalyq aýrýhanada oblys boıynsha 32 naýqas em alyp jatsa, Maqtaaral aýdanynyń aýrýhanalarynda birde-bir naýqas joq.
Dárigerler qazirgi tańda evakýatsııalanǵan halyqty indetten saqtaý boıynsha barlyq sharany qolǵa aldy. Halyqqa antıseptık, betperde, qolǵap tegin taratylyp, ár azamattyń dene qyzýy teplovızormen tekserilip jatyr», delingen habarlamada.
