Maqtaaral aýdanynyń sý basqan aımaǵynda 494 úıdiń qurylysy aıaqtaldy
TÚRKІSTAN. QazAqparat – Maqtaaral aýdanyndaǵy sý tasqynynan zardap shekken Fırdoýsı men Órgebas eldi mekenderinde 504 turǵyn úıdiń 494-niń qurylystary aıaqtalyp, 10 úı jaqyn arada paıdalanýǵa beriledi.
Bul týraly Túrkistan oblysynyń ákimi Ómirzaq Shókeev brıfıng barysynda málim etti, dep habarlaıdy QazAqparat tilshisi.
Ómirzaq Estaıulynyń aıtýynsha, Maqtaaral aýdanyndaǵy Jeńis, Jańaturmys, Dostyq eldi mekenderiniń turǵyndaryna, Myrzakent kentinde jańadan boı kótergen yqshamaýdanda 386 jeke turǵyn úıdiń qurylysy tolyq aıaqtalyp, kiltteri úı ıelerine tabystalǵan.
Onyń ishinde 196 turǵyn úı qurylysyna Úkimettik rezerv esebinen qarjy bólinse, qalǵan 190 turǵyn úıdiń qurylysy qaıyrylymdyq jáne ózge de qorlar arqyly júrgizilgen.
«Budan bólek, Myrzakent kentindegi jańa móltek aýdanda 1200 oryndyq mektep pen 280 oryndyq balabaqsha, 1 dárigerlik ambýlatorııa jáne 1 polıtsııa beketiniń qurylysy júrip jatyr. Sondaı-aq, Fırdoýsı aýylynda 600 oryndyq mektep aǵymdaǵy jóndeýden ótse, 1 dárigerlik ambýlatorııa men 1 polıtsııa beketi, Órgebas aýylynda 1 feldsherlik-akýsherlik pýnkt pen 1 polıtsııalyq beketiniń qurylysy júrip jatyr. Joǵaryda atalǵan mektep pen balabaqsha kelesi jylǵa ótpeli bolsa, qalǵan nysandardyń qurylys jumystary aǵymdaǵy jyldyń jeltoqsan aıynda tolyq aıaqtalady dep josparlanýda. Atalǵan aýqymdy jumystardyń nátıjesinde aýdandaǵy eldi mekender odan ári kórkeıe tústi. Maqtaaral aýdanyndaǵy qazirgi jaǵdaı turaqty»,- dedi oblys ákimi.
