Maqtaaral aýdanynyń sý basqan aýmaqtarynan 6 mln tekshemetr sý soryldy
TÚRKІSTAN. QazAqparat – Nurlyjol, Órgebas, Yrysty jáne Jantaqsaı aýyldarynyń aýmaǵynda uzaqtyǵy 22 shaqyrym ýaqytsha bógetter salyndy, Myrzakent aýylyna qaraı úsh kollektor ornatylǵan, qum salynǵan 86 myń qap qoıyldy. Nurlyjol, Jańaturmys, Fırdoýsı, Órgebas, Dostyq jáne Jeńis aýyldarynda sý sorý jumystary jalǵasýda. Sý basqan aýmaqtardan barlyǵy 6,1 tekshe metr sý sorǵyzylǵan, dep habarlaıdy QazAqparat QR ІІM TJK baspasóz qyzmetine silteme jasap.
Budan basqa, Jeńis jáne Fırdoýsı aýyldarynda Túrkistan oblysy TJD men Apattar medıtsınasy ortalyǵynyń psıhologtary zardap shekken turǵyndarǵa psıhologııalyq kómek kórsetýde.
Qoǵamdyq tártipti qamtamasyz etý úshin Jańaturmys, Fırdoýsı, Órgebas jáne Jantaqsaı aýyldarynda tórt blok beket qoıylǵan.
Túrkistan oblysynyń apat ornynda Ózbekstan Respýblıkasy ІІM, QM, jergilikti atqarýshy organdar, TJM-nen jalpy 1626 adam, 324 tehnıka birligi, 17 júzý quraly, 216 sý sorǵyzý tehnıkasy jumyldyrylǵan.
Kómekke kelgen qaraǵandylyq qutqarýshylar Maqtaaral aýdanynyń Fırdoýsı aýylynda apattyq-qutqarý jumystaryn júrgizip, motosorǵylardyń kómegimen sýdy tartyp alýda. Qaraǵandylyq qutqarýshylar apat ornyna kelgeli 70 myń tekshe metr sý sorǵylanǵan.
Eske sala ketsek, Maqtaaral aýdanyndaǵy bes eldi mekeninde (Jańaturmys, Jeńis, Fırdoýsı, Órgebas, Dostyq aýyldary) 1030 turǵyn úıdi sý basyp otyr. Olardyń turǵyndary týystarynyń úıin jáne Maqtaaral aýdanynda qurylǵan 10 evakýatsııalyq pýnkte (Atakent-3 kenti, Órkenıet-1 aýyly, Esentaı-1 aýyly, Igilik-1 aýyly, Qyryqjyldyq-2 aýyly, Kókaral-1 aýyly, Jetisaı-1 aýyly) panalaýda, olarda 3252 adam ornalastyrylǵan.
