Maqtaaral aýdanynyń Órgebas aýylyndaǵy tazartylǵan ishki joldarda kólik júre bastady
MAQTAARAL AÝDANY. QazAqparat - Maqtaaral aýdanynyń Órgebas aýylynda ótkizilgen is-sharalardyń nátıjesinde avtokólik qozǵalysy úshin ishki avtojoldar ashyldy, dep habarlaıdy QazAqparat Tótenshe jaǵdaılar komıtetiniń baspasóz qyzmetine silteme jasap.
Komıtet málimeti boıynsha, aýdandaǵy apat saldaryn joıýǵa ІІM, Qorǵanys mınıstrligi, jergilikti atqarýshy organdardyń jáne Ózbekstan Respýblıkasy TJM-nyń 1 626 mamany, 324 tehnıka, 17 qaıyq, 217 sý sorý tehnıkasy jumyldyryldy.
«Nurlyjol, Jańaturmys, Ferdoýsı, Órgebas, Dostyq jáne Jeńis aýyldarynda 6,1 mln tekshe metr sý sorǵyzylǵan. Nurlyjol, Ferdoýsı, Órgebas, Yrysty jáne Jantaqsaı aýyldarynda jalpy uzyndyǵy 22 shaqyrym ýaqytsha bóget turǵyzyldy, Myrzakent aýyly baǵytynda 3 kollektor ornatyldy, qum salynǵan 87 myń qap tóselgen.
Jeńis, Órgebas, Ferdoýsı aýylyndarynda Ulttyq ulan jáne Qorǵanys mınıstrliginiń áskerı qyzmetshileri sý basqan úılerdi jáne aýlalardy saz balshyqtan tazartyp jatyr», delingen habarlamada.
Apattar medıtsınasy ortalyǵynyń shuǵyl brıgadasy Ferdoýsı, Órgebas jáne Nurlyjol aýyldarynyń 30 turǵynyna medıtsınalyq kómek kórsetken.
Budan basqa, Túrkistan oblysynyń TJD men Apattar medıtsınasy ortalyǵynyń psıhologtary Jeńis jáne Ferdoýsı aýylynda 226 turǵynǵa shuǵyl psıhologııalyq kómek kórsetken.
Qazir aýdanda qoǵamdyq tártipti qamtamasyz etý úshin 4 blokpost (Jańaturmys, Ferdoýsı, Órgebas, Jantaqsaı aýyldarynda) qoıylǵan.
