Maqtaaral aýdanynyń Órgebas aýylynda jańa úıler salyna bastady
MAQTAARAL. QazAqparat – Maqtaaral aýdanyndaǵy Órgebas aýylynyń turǵyndary sý tasqynynda zaqym kelgen úılerin buzyp, ornyna salynatyn jańa baspananyń qurylysyna kirisip ketti. Aýyl turǵyndarynyń árqaısysyna Úkimet rezervinen bólingen 17 mln teńgeniń jarty aqshasy berilip jatyr, dep habarlaıdy QazAqparat tilshisi.
Atalǵan aýylda jalpy 190 úı bar bolsa, búginde onyń 168 úı ıesine 8,5 mln teńge aýdarylǵan. Qalǵan otbasylarmen kelesimshart jasalyp jatyr. Bólingen qarajattyń kólemi jergilikti halyqqa úsh bólikpen aýdarylatyn bolady. Qazirgi tańda Órgebas aýylynda 118 úı kúrelip, 35 úıdiń irgetasy quıylyp jatyr. Sondaı-aq, úsh úıdiń qabyrǵasy qalana bastaǵan.
«Memleketten berilgen 8,5 mıllıon teńgeni alyp, óz qalaýymyzsha úı salyp jatyrmyz. Qabyrǵasyn kirpishten qalaımyn dep josparlaǵanmyn. Qurylysty eki aıda aıaqtap, kún sýyǵanǵa deıin úıge kirip alamyz dep otyrmyz. Jumysshylar jetkilikti, qarjy ýaqytynda aýdaryldy», - deıdi aýyl turǵyndarynyń biri Malybek Joldasov.
Al, reseılik Álısher Ýsmanov qorynyń 1 000 dollarlyq járdemaqysy aýyldyń 105 januıasyna berilgen. Ózge otbasylardyń qujaty rásimdelip jatyr.
Aıta keteıik, aýyldaǵy úılerdi kúreý men qurylys jumystaryna 54 jumysshy men 9 tehnıka jumyldyrylǵan.
