Maqtaaral aýdanynyń eldi mekenderinen 6,2 mıllıon tekshe metr sý soryldy
NUR-SULTAN. QazAqparat - Maqtaaral aýdanynyń eldi mekenderinen 6,2 mıllıon tekshe metr sý soryldy. Bul týraly QR ІІM Tótenshe jaǵdaılar komıtetinen málim etti, dep habarlaıdy QazAqparat tilshisi.
«Nurlyjol, Ferdoýsı, Órgebas, Dostyq jáne Jeńis eldi mekenderinen 6,2 mln tekshe metrden astam sý soryldy. Jalpy uzyndyǵy 22 shaqyrym ýaqytsha bógetter salyndy. 87 000-nan astam qap tóseldi jáne sý burý úshin 3 kollektor ornatyldy. Júrgizilgen jumystardyń nátıjesinde Órgebas aýylynda avtokólik qozǵalysy úshin ishki avtojoldar ashyldy. Ferdoýsı aýylynda bir táýlikte 10-nan astam aýladan sý soryldy», - delingen komıtet aqparatynda.
Vedomstvo málimetinshe, Jeńis, Órgebas jáne Ferdoýsı aýyldarynda Ulttyq ulan jáne Qorǵanys mınıstrliginiń áskerı qyzmetshileri sý basqan úıler men aýla aýmaqtaryn batpaqtan tazartý jumystaryn júrgizýde. Sonymen qatar, Túrkistan oblystyq tótenshe jaǵdaılar departamenti men Shymkent qalalyq tótenshe jaǵdaılar basqarmasy Apattar medıtsınasy ortalyǵy fılıalynyń psıhologtary art-terapııa ádisterin qoldana otyryp, zardap shekkenderge psıhologııalyq kómek kórsetýde.
Jańaturmys, Ferdoýsı, Órgebas, Jantaqsaı aýyldarynda qoǵamdyq tártipti qamtamasyz etý úshin 4 blokpost qoıyldy. Táýlik boıy ІІM, QO, JAO jáne Ózbekstan TJM kúshteri men quraldary 1626 adam, 324 birlik tehnıka, 17 júzý quraly, 217 motopompa jumysyn jalǵastyrýda.
«Maqtaaral aýdanynda tótenshe jaǵdaı bolǵaly beri 1 626 adam, 324 tehnıka, 17 júzý quraly jáne 217 motopompa apattyq qutqarý jumystaryn jalǵastyryp jatyr. Kesheden beri Іshki ister mınıstrliginiń jáne jergilikti atqarýshy organnyń bekitilgen tehnıkalarynyń, Ózbekstannyń Úkimeti tarapynan jumyldyrylǵan adamdar men kúsh-quraldardyń kómegimen 300 tekshe metrden astam sý sorylyp, qaýipsiz jerge aǵyzyldy», - dedi Túrkistan oblystyq TJD bastyǵy, azamattyq qorǵanys polkovnıgi Nurǵalı Júnisov.
