Maqtaaral aýdanynyń ákimi «Maqtaaral» fýtbol komandasynyń oıynshylarymen kezdesti
MAQTAARAL. QazAqparat – Túrkistan oblysy, Maqtaaral aýdanynyń ákimi Baqyt Asanov «Maqtaaral» fýtbol klýbynyń ujymymen kezdesti. Atakent kentindegi «Alpamys batyr» stadıonynda ótken kezdesýde aýdan basshysy oıynshylarǵa sáttilik tilep, jeńiske jetýleri úshin qamshylady, dep habarlaıdy QazAqparat tilshisi.
«Maqtaaral aýdany maqtasymen ǵana emes, damyǵan fýtbol ındýstrııasymen de tanymal bolýy qajet. Respýblıkamyzdaǵy aýdannan shyqqan jalǵyz komanda retinde el birinshiliginde básekeli oıyn kórsetip júrgen »Maqtaaral« fýtbol klýby men birneshe ret »Qazaqstan chempıony« atanǵan klýbtyń jasóspirimder quramasy osy salada aýdannyń áleýeti joǵary ekenin kórsetip tur. Biz fýtbolymyzdy árbir maqtaaraldyq maqtanatyndaı deńgeıge jetkizýge tıispiz» - dedi Baqyt Asanov.
Aıta keteıik, «Maqtaaral» fýtbol komandasy bıylǵy maýsym aldynda jospar boıynsha 4 oqý-jattyǵý jıynyn ótkizip, 24 oıynshymen komanda jasaqtaldy. Qazaqstan fýtbol federatsııasynyń bekitken kestesine sáıkes, óz alanyńda jalpy sany 13 match ótkizgen. Onyń ishinde 8 oıyndy jeńispen, 5 oıyndy jeńilispen aıaqtaǵan. Sondaı-aq, syrt alańda 12 oıyn ótkizip, 5 oıynda basymdyq tanytqan. Al, 2 oıynda teń túsip, taǵy 5 oıynda jeńilis tapqan. Qazirgi tańda týrnırlik keste boıynsha «Maqtaaral» besinshi orynda tur. Árıne, bul aýdannan shyqqan komanda úshin úlken jetistik jáne bul tájirıbeli jattyqtyrýshylar men joǵary sapaly klýb menedjerleriniń arqasy ekeni belgili. Maqtaaraldyq fýtbolshylar bıyl jalpy sany 34 gol salǵan bolsa, surmergenderdiń kóshin Beknur Rysqul, Farrýh Shotýrsýnov, Abylaıhan Mahambetov, Konstantın Zadorojnyılar bastap tur.
Eske salaıyq, klýbtyń sońǵy oıyny 3 qarasha kúni syrt alańda Taldyqorǵan qalasynyń «Jetisý B» komandasymen ótedi. Eger, qarsylastaryn jeńse jáne teń nátıje kórsetse respýblıkada besinshi oryndy saqtap qalmaq. Jeńilis tapsa, fýtbol maýsymyn altynshy orynmen aıaqtaıdy dep kútilýde.
