Maqtaaral aýdanyndaǵy sý basqan aımaqtaǵy oqýshylar qashyqtan bilim alýyn jalǵastyrýda
MAQTAARAL. QazAqparat – Maqtaaral aýdanyndaǵy sý basqan eldi mekenderdiń oqýshylary evakýatsııalyq pýnktterde bilimderin jalǵastyrýda.
Balalarǵa onda qashyqtan oqýǵa jaǵdaı jasalǵan. Naqtyraq aıtqanda atalmysh oryndarǵa televızorlar qoıylyp, endi olar «Balapan» men «Elarna» telearnalary kóre alady, dep habarlaıdy QazAqparat tilshisi.
Aıta keteıik, aýdandaǵy sý basqan Jeńis, Nurly jol, Jańaturmys, Órgebas, Ferdaýsı aýyldarynda jalpy sany 5 mektep bar. Onda 1638 oqýshy bilim alady. Al, 6 mektepke deıingi bilim berý uıymynda 425 adam jumys isteıdi. Apat bolǵan aımaqta oqýshylar qajetti keńse zattary, oqý quraldarymen qamtamasyz etilgen. Balalar bos ýaqytynda tanymdyq, sporttyq oıyndar oınap, kitap oqýmen aınalysýda.
Sala mamandarynyń aıtýynsha, ata-analar men oqýshylardyń kóńil-kúıi men psıhologııalyq ahýaly birqalypty. Bilim bóliminiń uıymdastyrýymen mektep psıhologtary tótenshe jaǵdaı saldarynan zardap shekken aýyl turǵyndary men oqýshylarǵa psıhologııalyq kómek kórsetýde.
Jergilikti turǵyndar men mektep ákimshilikteri arasynan jáne kórshi Shardara, Keles, Saryaǵash, Jetisaı, Arys aýdandarynan demeýshiler tabylyp, zardap shekken otbasylar men oqýshylarǵa azyq-túlik, kıim-keshek jáne taǵy da basqa zattaryn alyp berip jatyr.
