Maqtaaral aýdanynda «Jaıdarman» oıyndary ótti
MAQTAARAL. QazAqparat – Túrkistan oblysy Maqtaaral aýdanynda «Jaıdarman» ortalyq lıgasy oıyndary bolyp ótti. «Jastar resýrstyq ortalyǵynyń» uıymdastyrýymen ótken óner saıysyna arnaýly orta oqý oryndary men jalpy orta mektepterden 9 komanda qatysty, dep habarlaıdy QazAqparat tilshisi.
Oıyn barysynda ár top óziniń jeńiske degen jigerliligi men tynymsyz izdenisterin, tyńǵylyqty daıyndyqtaryn kórsetti. Elimizdiń keshegisi men búginin, jahandaný dáýiriniń artyqshylyqtary men keıbir kemshin tustaryn, búgingi urpaq tárbıesiniń aqsap turǵan jerlerin astarly ázil-qaljyńdarymen kórermenge jetkize bildi. Ádil qazylardyń sheshimimen «Sátbaev serileri», «Onlaın», «Maqtaaral maqtanyshtary», «Bolashaq jastary», «Alaqaı balaqaı», «Seriler» syndy komandalar jaıdarmannyń kelesi kezeńi jartylaı fınal oıynyna joldama alyp, jeńiske jetti. Oıyn sońynda respýblıkalyq lıgalarda ózindik oıyn úlgisimen tanylyp, aýdannyń namysyn qorǵap júrgen jaıdarmanshylar izbasar ini-qaryndastaryna óz ónerlerin kórsetti.
