Maqtaaral aýdanynda sý deńgeıi eki metrge jýyq tómendedi
MAQTAARAL. QazAqparat – Túrkistan oblysynyń Maqtaaral aýdanynda sý deńgeıi ortasha 175 santımetrge tómendedi. Bul týraly «Qazsýshar» respýblıkalyq memlekettik kásiporny Memlekettik tehnıkalyq qyzmeti departamentiniń bastyǵy Denıs Konovalov málim etti, dep habarlaıdy QazAqparat tilshisi.
D. Konovalovtyń aıtýynsha, Órgebas aýylynda úsh táýlik ishinde sý 167 sm, Fırdoýsıde 155 sm tómendegen. Sý sorý úshin «Qazsýshar» mekemesiniń arnaıy tehnıkalary jumyldyrylǵan. Sondaı-aq, bul jumystarǵa oblystyq Tótenshe jaǵdaılar departamenti men Qazaqstannyń ózge aımaqtarynan kelgen mobıldi toptar tartyldy. Qazirgi tańda atalǵan aýyldarda qyzý jumys júrip, nátıjesinde sý deńgeıi orta eseppen 175 sm azaıǵan.
QR ІІM, «Qazsýshar» RMK, Ózbekstannyń TJM qyzmetkerleri men arnaıy tehnıkalary Maqtaaral aýdanynyń basqa da eldi mekenderinde qurǵatý jumystaryn júrgizip jatyr.
«Jetisaı aýdany, Qoǵaly aýylynyń janyndaǵy avtomobıl jolynyń boıynda nyǵaıtý jumystary júrgizildi. Nurlyjol, Fırdoýsı, Órgebas, Yrysty, Jantaqsaı eldi mekenderiniń aýmaǵynda 85982 qap qum tóselip, uzyndyǵy 22 shaqyrymdy quraıtyn qum salynǵan ýaqytsha bógetter salyndy. 80 birlik tehnıka jumyldyrylyp, 3 kollektor salyndy. Avarııalyq-qutqarý jumystaryn barlyǵy 1635 adam júrgizip, 297 birlik tehnıka, 17 qaıyq, 217 motopompa paıdalanylǵan»,- dedi Denıs Konovalov.
