Maqtaaral aýdanynda saýda logıstıkalyq ortalyq qurylady
TÚRKІSTAN. QazAqparat - Túrkistan oblysynyń ákimi Ómirzaq Shókeev jumys saparymen Maqtaaral aýdanyna bardy. Ondaǵy birqatar óndiris oshaqtaryn aralap, atqarylyp jatqan jumystarmen tanysty, dep habarlaıdy QazAqparat tilshisi.
Oblys basshysy aldymen Dostyq aýyldyq okrýgi Besketik aýylyndaǵy «Altyn aımaq» sharýa qojalyǵynda boldy. Qojalyqtyń ıeliginde 90 gektardan astam egistik jeri bar. Bıyl onyń 80 gektaryna qaýyn, 5 gektaryna maqta, 5 gektar jerge jońyshqa egý josparlanǵan. 31 adam turaqty jumyspen qamtylǵan. Kóktemgi dala jumystary erte bastalatyn aýdanda búginniń ózinde 2090 gektar qaýyn, 692 gektar qarbyz, 694 gektar jońyshqa, 281 gektar qyryqqabat, 22 gektar qyzylsha, 5,5 gektar bolgar buryshy, 1,5 gektar qyzanaq, 5 gektar jerge kartop daqyldary egilgen.
Sondaı-aq, óńir basshysy Myrzakent kentindegi Q.Muńaıtpasov atyndaǵy ortalyq stadıonǵa aıaldady. Kólemi 2,5 gektar jerdi qamtıtyn stadıon qaıta qurylymdaýdy qajet etedi. Ol úshin jobalyq smetalyq qujaty daıyndalyp, 2017 jyly memlekettik saraptamanyń oń qorytyndysy berilgen. Jobanyń jalpy quny 288,5 mıllıon teńgeni quraıdy.
Oblys ákimi aıaldaǵan sońǵy nysan - Túrkistan oblysy boıynsha memlekettik kirister departamentiniń «Atameken» keden beketi boldy. Munda óńir basshysy kedendik bekettiń aımaǵyn kóriktendirý, kógaldandyrý, keńeıtý josparymen tanysty.
Atap aıtqanda, shekara mańynan saýda logıstıkalyq ortalyǵyn qurý, onyń ishinde saýda bazarlary, qonaq úı, avtoturaq, qoımalar, turǵyn úıler men túrli sporttyq alańshalardy salý kózdelýde.
