Maqtaaral aýdanynda probatsııa úıi ashyldy
MAQTAARAL. QazAqparat – Túrkistan oblysy Maqtaaral aýdanynda alǵash ret probatsııa úıi ashyldy. Ortalyqtyń ashylý rásimine aýdan ákimi Baqyt Asanov pen aýdandyq quqyq qorǵaý organdarynyń basshylary, qoǵamdyq uıym tóraǵalary men aýdandyq jumyspen qamtý jáne áleýmettik baǵdarlamalar bólimi jáne jumyspen qamtý ortalyǵynyń basshylary qatysty, dep habarlaıdy QazAqparat tilshisi.
Probatsııa úıinde bas bostandyǵynan aıyrý oryndarynan bosatylǵan jáne probatsııa qyzmetiniń esebinde turǵan adamdarǵa áleýmettik-quqyqtyq, medıtsınalyq jáne zań turǵysynda kómek kórsetiledi. Olardyń jumysqa ornalastyrý, qujattandyrý, zeınetaqy jáne járdemaqylardy rásimdeýge qoldaý jasalady. Osylaısha atalǵan is-sharalar ortalyqtandyrylyp, qyzmet atqarý tártibi men rettiligi «bir tereze» qaǵıdasy boıynsha jeńildetilip otyr.
«Maqtaaral aýdany boıynsha probatsııa qyzmetiniń esebinde turǵan adamdarǵa áleýmettik-quqyqtyq, medıtsınalyq kómek kórsetý boıynsha «Probatsııa úıin» ashý úshin aýdan ákimdigi tarapynan qaýly qabyldanǵan bolatyn. Mine, búgin atalǵan úı paıdalanýǵa berilip otyr. Qazirgi tańda probatsııa qyzmetinde esepte turǵan azamattarǵa áleýmettik qoldaý sharalaryn kórsetý boıynsha aýdan ákimdigi tarapynan jumys jospary bektitilip, josparǵa sáıkes tısiti jumystar atqarylýda», - dedi jıynda sóz sóılegen aýdan ákimi Baqyt Asanov.
Aıta keteıik, jyl basynan beri aýdanda probatsııa esebinde turǵan azamattarǵa áleýmettik qoldaý sharalaryn kórsetýge probatsııa qyzmeti bólimi tarapynan 43 adam joldanǵan. Onyń ishinde 21 adamǵa áleýmettik qoldaý sharalary kórsetilgen.
Atap aıtqanda, 1 adam jastar praktıkasyna, 2 adam qoǵamdyq jumystarǵa, 6 adam qysqa merzimdi kásiptik oqýǵa joldansa, 12 adam aýdannan bekitilgen «Probatsııa qyzmetinde esepte turǵan azamattardy jumyspen qamtý kvotasyna» sáıkes, «El sý» JShS-ne jáne Atakent kentiniń aýrýhanasyna joldanǵan. Sonymen qatar, 22 adamnyń otbasyna ataýly áleýmettik kómek taǵaıyndalǵan.
