Maqtaaral aýdanynda maqta terimi bastaldy
MAQTAARAL. QazAqparat - Túrkistan oblysy Maqtaaral aýdanynda maqta terimi bastaldy. Jalpy aýmaǵy 38,2 myń gektar jerde terim jumystaryna 15 brıgada men 403 terimshi qatysýda, dep habarlaıdy QazAqparat tilshisi.
Qazirgi tańda negizinen qol terim jumystary júrgizilip, 125 gektar maqta alqabynan 269,5 tonna «aq altyn» qambaǵa jınaldy. Terim naýqanyna daıyndaý úshin kombaındarǵa jóndeý jumystary tolyqtaı júrgizilgen.
Qosymsha aýdanǵa AQSh-tan 23 dana «Djon-Dır» maqta terim kombaıny satyp alynyp, terim jumystaryn jeńildetip otyr. Búginde daıyn ónimdi mashınalyq ádispen terý 66%-ǵa jetkizilmek.
Sala mamandarynyń sózinshe, bıylǵy maqta terim naýqanyna 514 dońǵalaqty traktor men 1206 tirkeme jáne 151 kombaın qatysady dep kútilýde.
Aıta keteıik, ótken jyly aýdanda maqta óndiretin 5 zaýyt jáne maqta qabyldaıtyn 60-tan astam beket sharýalarǵa qyzmet kórsetken. Bıyl da bul óndiris oryndary jıyn-terim naýqanyna daıyndalýda.
Sondaı-aq, kúzgi dala jumystaryn júrgizýge memleket tarapynan jeńildetilgen baǵamen janar jaǵarmaı sharýalarǵa taratylýda.
