Maqtaaral aýdanynda «Qys-2019» oqý-jattyǵý jıyny ótti

MAQTAARAL. QazAqparat – Túrkistan oblysy Maqtaaral aýdanynda «Qys-2019» respýblıkalyq komandalyq-shtabtyq oqý-jattyǵý jıyny ótti. Azamattyq qorǵaý memlekettik júıesin uıymdastyrýdy jetildirý maqsatynda ótken jıynda basqarý organdaryn, kúshter men quraldardy daıarlaý sharalary pysyqtaldy, dep habarlaıdy QazAqparat tilshisi.

Komandalyq-shtabtyq oqý-jattyǵýǵa aýdan ákimi Baqyt Asanov arnaıy qatysyp, azamattyq qorǵanys jáne tótenshe jaǵdaılar jónindegi qyzmetterdiń daıyndyǵyn qarap shyqty. Qys kezindegi tótenshe jaǵdaılardy joıý jónindegi is-áreketter, atap aıtqanda kóshirý is-sharalaryn, ishki ister organdarymen ózara árekettesý josparlaryn naqtylady.

Sondaı-aq, barlyq deńgeıdegi avarııalyq-qutqarý, dıspetcherlik jáne boljaý qyzmetteriniń jumysyn, jedel kezekshilik pen basqarýynyń uıymdastyrylýyn, habarlaý jáne baılanys júıesiniń daıyndyǵyn tekserdi.

Qysqy kezeńdegi yqtımal tótenshe jaǵdaılardy joıý úshin qurylǵan avarııalyq-qutqarý qyzmetiniń qurylymy men qural-saımandarynyń esebi de anyqtaldy. Jıyn barysynda energııa, gaz, jylý, aýyz sýmen qamtamasyz etý júıeleriniń jáne kólik qatnastarynyń jumys isteýge daıyndyǵy, táýelsiz energııamen qamtamasyz etý kózderiniń, materıaldyq-tehnıkalyq, azyq-túlik, medıtsınalyq jáne basqa da qorlardyń shamasy belgili boldy. Oqý-jattyǵý barysynda avarııalyq-qutqarý qyzmeti jáne basqa da kezek kúttirmeıtin jumystardy júrgizýde shuǵyl basqarý áreketteri pysyqtaldy. Halyqty shuǵyl habarlandyrý úshin aýdandyq ortalyqtandyrylǵan habarlaý júıeleri, daýys kúsheıtkish quraldary, teledıdar jáne basqa da BAQ arqyly taratý tártibi qaraldy. Tótenshe jaǵdaılar aımaǵynda jáne avtokólik kommýnıkatsııalarynda adam ólimine jol bermeý boıynsha qurylymdardyń is-áreketteri, apat aımaǵynan adamdardy izdeý, olardy ýaqytsha ornalastyrý aımaqtaryna kóshirý, zardap shekkenderge birinshi dárigerlik jáne medıtsınalyq kómek kórsetý sııaqty máseleler de oqý-jattyǵý barysynda naqtylandy.