Maqtaaral aýdanynda qurylys jumystary táýlik boıy júrip jatyr
MAQTAARAL. QazAqparat – Maqtaaral aýdanyna jumys saparymen barǵan Túrkistan oblysynyń ákimi Ómirzaq Shókeev ondaǵy tótenshe jaǵdaı saldaryn joıý jumysynyń barysyn baqylady. Oblys basshysynyń tapsyrmasyna saı kúsheıtilgen jumys tártibine kóshken barlyq qurylys jumystary qarqyndy júrgizilýde, dep habarlaıdy QazAqparat tilshisi.
Oblys ákimi sý basqan Órgebas jáne Ferdaýsı aýyldarynyń turǵyndarymen kezdesip, salynyp jatqan áleýmettik nysandardy aralady. Jańajol aýyldyq okrýgi Órgebas aýylynda ornalasqan Q.Amanjolov atyndaǵy №22 jalpy orta mektebiniń qurylysyn tekserdi. Oblystyq bıýdjet esebinen qurylysy bastalǵan 200 oryndyq jańa mektep bıyl paıdalanýǵa berilmek. Sondaı-aq, munda feldsherlik-akýsherlik pýnkt ǵımaraty da salynyp jatyr.
«Qysqa merzimde aýqymdy jumys atqaryldy. Halyqty tirshilikpen qamtamasyz etetin nysandar men ınfraqurylymdar qalpyna keltirilýde. Halyqty erterek baspalaryna jaıǵastyrý úshin qurylys jumystary kúsheıtildi. Jaýapty aýǵan ákimderi, basshylary osynda. Qurylysty ýaqytynda aıaqtaý úshin kún-tún demeı eńbek etip jatyr», - dedi Ómirzaq Shókeev.
Jalpy kólemi 1256 gektardy quraıtyn Órgebas eldimekeninde 209 úı ornalasqan. Onda sý basqan úıler buzylyp, aýmaǵy tazartylyp, úılerdiń irgetasy quıylǵan. 70 úıdiń qabyrǵasy qalanyp, shatyry jabylýda.
Qurylys jumysyna 613 adam tartylǵan. 2377 adam turatyn Fırdoýsı aýylyn qalpyna keltirý jumystary da tynymsyz júrgizilip jatyr. Jalpy kólemi 1358 ga bolatyn aýylda 327 úı ornalasqan.
Búgingi tańda ondaǵy jaramsyz úıler buzylyp, úı aýmaqtary tazartylǵan. Basym bóliginiń irgetasy quıylyp, 96 úıdiń qabyrǵasy qalanyp, shatyry jabylýda. Al, qurylys jumystaryna 1002 adam tartylǵan.
Sonymen birge, Ferdaýsı atyndaǵy mektepte aǵymdaǵy jóndeý jumystary bastaldy. Aýyldaǵy aýyz sý júıelerin qaıta qurý jumystary júrgizilýde. 33 km qubyr júrgizip, uńǵymalar burǵylanǵan.
Abonenttik jáshikter qoıylyp, jańa sý munarasyn ornatý jumystary bastalǵan.
