Maqtaaral aýdanynda kópqabatty úıler sany kóbeıedi
MAQTAARAL. QazAqparat – Túrkistan oblysy, Maqtaaral aýdanyda kópqabatty úıler sany kóbeıedi. Myrzakent kentin ulǵaıtýǵa arnalǵan 160 gektar jer telimine baspanalar salý úshin bıyl arnaıy joba ázirlenýde, dep habarlaıdy QazAqparat tilshisi.
Jer telimi ınfraqurylymmen qamtamasyz etilip, kópqabatty turǵyn úılerdiń qurylysy bastaý almaq. Osylaısha 7-20-25 baǵdarlamasy aıasynda maqtaaraldyqtar baspanaly bolady dep josparlanǵan. Jalpy, qurylǵanyna endi ǵana bir jyl bolǵan Maqtaaral aýdany qurylystyń ordasyna aınalyp otyr. Atakent kenti men aýdannyń barlyq eldi mekenderinde aldaǵy ýaqytta qurylys jumystary qarqyn ala túspek. Ol úshin qazirgi tańda 39 eldimekenniń bas jospary jasalýda. Sonymen qatar, mektepter, mádenıet úıleri, ákimshilik ǵımarattary, kóp qabatty turǵyn úıler salynady dep kútilýde. Jańadan qurylǵan aýdannyń derbes bólimderin zamanaýı ǵımaratpen qamtamasyz etý maqsatynda Myrzakent kentinen ákimshilik ǵımaratynyń qurylysyn bastaý úshin SJT ázirlengen. Sondaı-aq, Eńbekshi jáne Jambyl aýyldyq okrýgteriniń ortalyqtarynan mádenıet oshaqtaryn damytý maqsatynda 2 mádenıet úıi jáne kitaphana qurylysyna bıyl jobalyq smetalyq qujattama ázirleý josparlanyp otyr.
Máselen, Birlik aýyldyq okrýgine qarasty Pernebaev eldi mekenin keńeıtýge bólingen 5 gektar jer telimine aýyz sý jáne elektr jaryǵyn alyp barý úshin jobalyq smetalyq qujattama daıyndalýda. Al, Jańa jol jáne Birlik aýyldyq okrýgterinde mal ólekselerin tastaıtyn shuńqyr qurylystary salynbaq. Aıta keteıik, búgingi kúni Maqtaaral aýdanynda respýblıkalyq bıýdjet esebinen 2 mektep jáne oblystyq bıýdjet esebinen 5 mekteptiń qurylys jumystary júrgizilýde.
