Maqtaaral aýdanynda qoqys polıgony órtenip, aýyldy kók tútin basty
Áleýmettik jelide Maqtaaral aýdanyndaǵy qoqys polıgonynyń órtenip jatqany jaıynda vıdeo tarady. Sonyń saldarynan jaqyn mańdaǵy aýyldardyń ishin kók tútin basyp, óńirge jaǵymsyz ıis tarap ketken. Áleýmettik jeli arqyly narazylyqtaryn jetkizgen turǵyndar «órtenip jatqan qoqystardy óshirýge tyrysyp jatqan adam joq» dep jazdy.
«Mine, búgin 3-shi kún boldy qoqystyń tútinine ýlanyp jatyrmyz. Aýyldyń ishi kók tútin» - deıdi vıdeo avtory Súndet Manapbek.
Atalǵan jaǵdaıǵa baılanysty pikir bildirgen Maqtaaral aýdany ákimdiginiń baspasóz qyzmeti órttiń 25 mamyr kúni sóndirilgendigin jetkizdi.
«Jalpy 25-mamyr kúni saǵat 11:35 shamasynda Maqtaaral aýdany Maqtaaral aýyldyq okrýginde ornalasqan qoqys polıgonynda órt shyqqany týraly aýdandyq tótenshe jaǵdaılar bólimine habar túsken. 2 órt sóndirý kóligi, 4 tehnıka jáne 15 shaqty jeke quram órt sóndirýge jumyldyrylyp, keshki 21:00 shamasynda óshirildi. Negizi aýa-raıynyń qolaısyzdyǵynan (jeldi bolýynan) órt keń taralyp, úlken qıyndyqtar týǵyzdy» - delingen aýdan ákimdigi taratqan aqparatta.
Óńir turǵyndarynyń aıtýynsha búginde órt sóndirilgenmen, tútini áli tolyq basylmaǵan. Sonyń saldarynan maqtaaraldyqtar qoqys tútinnen qutyla almaı otyrǵany jaıy bar.
