Maqtaaral aýdanynda 115 otbasyǵa kómek kórsetilmek

MAQTAARAL.QazAqparat – Túrkistan oblysy Maqtaaral aýdanynda «Qamqorlyq» baǵdarlamasy aıasynda 115 otbasyǵa kómek kórsetilmek. Aýdan ákimi Baqyt Asanov osy baǵdarlamǵa engen Myrzakent kentindegi muqtaj otbasylardyń úılerin arnaıy aralap, jaǵdaılarymen tanysty, dep habarlaıdy QazAqparat tilshisi.

Aýdan ortalyǵy Myrzakent kentinde qıyn jaǵdaıǵa tap bolǵan jáne áleýmettik jaǵdaılary óte tómen 12 otbasy atalǵan baǵdarlamaǵa engen. Bul otbasylardyń basym bóligi turǵyn úılerin kúrdeli jóndeýge muqtaj. Tipti, kúndelikti tutynatyn azyq-túlikterin alýǵa jaǵdaılary jetpeıtinderi de bar.

Sonymen qatar, kıim-keshekke, turmystyq qatty otynǵa da qajettilikteri týyndap otyr. Aýdan basshysy árbir otbasynyń jaǵdaıymen jeke tanysyp, otbasynyń jumysqa qabiletti múshelerin jumysqa ornalastyrýǵa jáne kásipkerlik baǵdarlamasy aıasynda óz kásipterin ashýǵa kómek beriletinin jetkizdi.

Sondaı-aq, turǵyn úıge muqtajdyǵy bar otbasylardy jer men úı kezegine turǵyzý úshin kent ákimi apparatynyń qyzmetkerlerine arnaıy tapsyrma berdi.

Aıta keteıik, «Qamqorlyq» keshendi baǵdarlamasy boıynsha oblystyq jáne aýdandyq bıýdjet esebinen, demeýshiler jáne qaıyrymdylyq qorlar arqyly muqtaj otbasylardyń árbir múshesine kómek berý qarastyrylǵan. Atap aıtqanda olarǵa medıtsınalyq, jumysqa ornalasý, azyq-túlik pen turmystyq zattar áperý, bilim alý jáne ózge de máseleler boıynsha turaqty kómek kórsetilip, eńse tikteýlerine jaǵdaı jasalýda.