Maqtaarada terim naýqanyna baılanysty semınar-keńes ótti
MAQTAARAL. QazAqparat – Túrkistan oblysy, Maqtaaral aýdanyndaǵy Qazaq maqta sharýashylyǵy ǵylymı-zertteý ınstıtýtynyń bazasynda maqta daqylyn kúzgi jıyn-terim naýqanyna daıyndaý máseleleri jóninde arnaıy semınar-keńes ótti, dep habarlaıdy QazAqparat tilshisi.
Aýdan ákimi Baqyt Asanov tóraǵalyq etken jıynǵa Jetisaı aýdanynyń ákimi Jamantaı Beısenbaev, oblystyq aýyl sharýashylyǵy basqarmasy basshysynyń orynbasary Tımýr Derbis, Maqtaaral jáne Jetisaı aýdandary ákimderiniń orynbasarlary, aýyldyq okrýg ákimderi, jer jáne aýyl sharýashylyǵy boıynsha basshylar men mamandar, maqta zaýytynyń basshylary, sharýa qojalyq tóraǵalary qatysty.
Semınardyń kún tártibinde maqta qozasyna túrli defolıanttardyń áseri jáne olardy tıimdi qoldaný, ınnovatsııalyq ádisterdi paıdalaný arqyly sapaly tuqymdyq shıt daıyndaý, maqta shıkizatyn óndirýdi sýbsıdııalaý jáne maqta daqylyn kúzgi jıyn-terimge daıyndaý sııaqty birneshe máseleler qaraldy. Jıyn barysynda «Ketebaı» óndiristik kooperatıviniń tóraǵasy, Jetisaı aýdandyq maslıhat depýtaty Sádý Bekenov, Qazaq maqta sharýashylyǵy ǵylymı-zertteý ınstıtýtynyń Bas dırektorynyń orynbasary Orazbek Bıǵaraev jáne dál osy ınstıtýttyń tehnologııalardy transfertteý jáne beıimdeý bóliminiń meńgerýshisi Amandyq Qostaqovtar baıandama jasady. Sondaı-aq, ınstıtýttyń dırektory Ibadýlla Úmbetaev maqta ónimin molaıtýdyń ózekti máseleleri jóninde óziniń qundy ári paıdaly keńesterimen oı bólisti. Jıyndy qorytyndylaǵan aýdan basshysy Baqyt Asanov kúzgi jıyn-terim naýqany jaýapty kezeń ekenin atap ótip, osy bir naýqandy tıimdi ári sátti uıymdastyrý úshin judyryqtaı jumyla jumys isteý kerektigin eske saldy. Aıta keteıik, bıyl maqtaaraldyq dıqandar 38 myńnan asa gektar jerge maqta shıtin sepken bolatyn. Qazirgi tańda eń birinshi bolyp aýdanǵa qarasty J.Nurlybaev aýyldyq okrýginiń sharýalary maqta terim naýqanyn bastap ketti.
