Maqta terýge baryp mert bolǵan jasóspirimniń ólimine qatysty qylmystyq is qozǵaldy
ShYMKENT. QazAqparat - Ońtústik Qazaqstan oblysynda túnde maqtaǵa tunshyǵyp ólgen jasóspirimniń ólimine qatysty qylmystyq is qozǵaldy. Bul týraly oblystyq ІІD baspasóz qyzmetiniń jetekshisi Saltanat Qarakózova málimdedi, dep habarlaıdy QazAqparat tilshisi.
Aıta keteıik, kúni keshe ǵana Ordabasy aýdanyna qarasty Tórtkúl aýylynda 16 jasar balanyń óli denesi maqta tıelgen tirkemeden tabylǵan bolatyn . Ol maqta jınaý jumystaryna barǵan kezde baqılyq bolǵany anyqtaldy. Qazir Ordabasy aýdandyq polıtsııa bólimimen kisi ólimine ákep soqqan iske qatysty tergeý amaldary bastalyp ketti. Jumys berýshi men sol túngi jumysshylardan jaýap alynýda eken.
«Osy oqıǵa boıynsha Qylmystyq kodekstiń 156 baby «Eńbekti qorǵaý qaǵıdalaryn buzý» boıynsha Ordabasy aýdandyq polıtsııa bóliminiń birińǵaı tekserý tizimine tirkeldi bul jaǵdaı. Qazirgi tańda birneshe saraptamalar taǵaıyndaldy. Sotqa deıingi tergeý amaldary júrgizilip jatyr», - dedi OQO ІІD baspasóz qyzmetiniń jetekshisi Saltanat Qarakózova.
Qaıtys bolǵan jasóspirimniń týystary bolsa jumys berýshiler mektep jasyndaǵy jasóspirimderdi túngi ondar shamasynda alyp ketkenin aıtady. Sol kúni ózge synyptastarymen Baǵdáýlet Ótebaev ta barypty. Sebebi, úıinde qoı deıtin ata-anasy bolmaǵan. Alys jaqqa nápaqa taýyp ketken eken. Túngi ekiler shamasynda bir tirkeme maqtany basyp bolǵan Baqdáýlet ekinshi tirkemege maqta artýdy kútip otyrǵanda kózi ilinip ketedi. Sol kezde onyń ústinen 2 tonna maqtany salyp jibergen. Aýyr maqtany kótere almaǵan jasóspirim sol jerde tunshyǵyp, jan tapsyrǵan. Alaıda, mektep oqýshysyn maqtanyń astynda qalǵanyn eshkim bilmegen. Ony eshkim izdemepti da. Jumys berýshi egistikte alańsyz tirligin tańerteńge deıin jalǵastyrǵan. Sóıtip, ertesine tirkemedegi maqtany qabyldaý pýnktine aparyp aýdaryp jibergende, balanyń óli denesi astynan shyqqan.
Aıta keteıik, marqum bolǵan Baqdáýlet otbasyndaǵy 4-shi balasy eken. Qoly qalt etkende ata-anasyna qolǵabys jasaǵan jasóspirim sol túngi eńbegi úshin nebári 500 teńgege jaldanypty. Búginde týystary jumys berýshiniń bala ómirine jaýapsyz qaraǵanyna ashynyp otyr.
«Baǵdáýlettiń denesin qaraǵanda kórdim, ókpesi ezilip ketken ǵoı, qantalap ketken. 2 tonna maqta qulaǵan ústine, ony kóterip shyǵý uıyqtap jatqan balaǵa ońaı bolmaǵan ǵoı. Sonda oqýshylardy tún jarymda jumysqa aparyp otyryp, olar qaıda eken dep izdemegeni nesi. Maqtasy qurysyn dep tirkemeni aýdaryp izdese de aman qalar ma edi. Bir jutym aýaǵa zar bolyp ólgen balamyz», - deıdi baqılyq bolǵan balanyń týysy Gýlvıra Dáýletova.
Tórtkúl aýylyndaǵy orta mekteptiń 11-shy synyp oqýshysy bolashaqta avtoelektrshi bolýdy armandaǵan eken. Endi armany oryndalmaǵan jasóspirimniń máıitin týystary keshe jer qoınyna tapsyrdy. Týystary kináliler jazadan jaltaryp ketpeı, jaýapqa tartylǵanyn qalaıdy.
